Көкпекті ауданының Шұғылбай ауылдық округінің әкімі Нұрлан Назарханов Қазақстан Республикасының жаңа Конституциясының күшіне енуіне байланысты өз пікірін білдіріп, Ата Заңның ел болашағы үшін тарихи маңызға ие екенін атап өтті.

Оның айтуынша, мемлекеттік қызметте, оның ішінде ауылдық округтің әкімі ретінде отыз жылдан астам уақыт бойы елмен бірге еңбек етіп, Қазақстанның даму жолындағы көптеген тарихи кезеңдердің куәсі болған. Осы жылдар ішінде мемлекет тұрақтылығы мен өркендеуінің басты кепілі – заңның үстемдігі мен халықтың бірлігі екеніне анық көз жеткізгенін жеткізді.

Әкімнің пікірінше, жаңа Конституцияда азаматтардың құқықтары мен бостандықтарын қорғауға, жергілікті өзін-өзі басқару жүйесін жетілдіруге, мемлекеттік басқарудың тиімділігін арттыруға, сондай-ақ әділдік пен ашықтық қағидаттарын нығайтуға ерекше басымдық берілген. Бұл өзгерістер ауылдық аумақтардың әлеуметтік-экономикалық дамуына оң әсерін тигізіп, тұрғындардың әл-ауқатын арттыруға және еліміздің тұрақты дамуына жаңа серпін береді.

Сөз соңында ауылдық округ әкімі жерлестерін Қазақстан Республикасының жаңа Конституциясының күшіне енуімен құттықтап, елге амандық пен бірлік тіледі.