Абай облысында сыбайлас жемқорлықтың алдын алу және қоғамда адалдық қағидаттарын қалыптастыру тақырыбында арнайы подкаст өтті. Подкаст барысында сыбайлас жемқорлыққа қарсы мәдениетті қалыптастыру, құқықтық сауаттылықты арттыру және заңнамадағы соңғы өзгерістер кеңінен талқыланды.

Қазақстан Республикасы Мемлекеттік қызмет істері агенттігінің Абай облысы бойынша департаменті Сыбайлас жемқорлықтың алдын алу басқармасының бас маманы Ерасыл Әділ қазіргі таңда сыбайлас жемқорлықпен күрестегі негізгі бағыт - құқық бұзушылықтарды анықтау ғана емес, ең алдымен олардың алдын алу екенін атап өтті.

Подкаст барысында жастар арасында адалдық мәдениетін қалыптастыру мәселесіне де ерекше назар аударылды. Бүгінде облыста «Адал ұрпақ» және «Саналы ұрпақ» клубтарының қатысуымен кездесулер, TEDx форматындағы іс-шаралар, форумдар, интеллектуалдық ойындар мен кітап көрмелері ұйымдастырылып келеді.

Сондай-ақ спикер заңнамадағы соңғы өзгерістерге тоқталып, мүдделер қақтығысының алдын алу тетіктері күшейтілгенін айтты. Оның сөзінше, бұл мемлекеттік аппараттың ашықтығын арттырып, қоғамның мемлекеттік органдарға деген сенімін нығайтуға ықпал етеді.

Подкаст соңында тұрғындар заңсыз әрекеттерге бейжай қарамай, сыбайлас жемқорлық фактілеріне куә болған жағдайда құзырлы органдарға хабарлауға шақырылды. Спикердің айтуынша, заң бойынша хабарлаған азаматтардың жеке деректері толықтай қорғалады.