Абай гарнизонында  тұңғыш рет «Айбын» облыстық әскери-патриоттық жиыны  өтті. Әр аймақтың айбынын асыруға асыққан оқушылар қауымы Шүлбі кентіндегі «Жас ұлан» ерлер лицейінің «Ұлан» патриоттық орталығында бас қосты. Өз алдына жеке облыс атанған өңірдегі өрендер сайысы өзгеше бастау алды. Оқушылар үшін «Шығыс» өңірлік қолбасшылығының  әскери оркестрі өнер көрсетсе, 30217 әскери бөлімінің барлау батальоны сахналанған ұрыс жекпе-жегі жиналған жұрт қошеметіне  бөленді. Ұйымдастырушы тарап дүбірлі дода алдында аталмыш шахардағы Жеңіс алаңына  гүл шоқтарын қоюды жөн көрді. Майдангерлер рухына тағзым жасау рәсімінен кейін, көптен күткен іріктеу кезеңі де  басталып кетті. Жастардың әскери-патриоттық тәрбиесін жетілдіру мақсатында іске асқан турнирде 10 команда бақ сынасты. Тартысты да қызықты сәттермен айшықталған жарыста оқушылар  әскери қолданбалы спорт түрлері бойынша кім мықтыны анықтады. Сайысқа қатысушы спорттық  жетістіктерімен шектелмей, интелектуалдық қабілетін де ортаға салды. Әр өңірдің «сен тұр, мен атайын» деген жеткіншегі «Smart Sarbaz» робототехника байқауына тыңғылықты дайындалған. Оқушылардың ғылымға жаңалық енгізетін туындылары төрешілердің таңданысын туғызбай қоймады. Әр сайыста оза шығып  жеңіс тұғырынан көрінген команда республикалық байқауға жолдама алмақ. Сондықтан әр сайысқа сақадай сай келген сайыпқырандар үш күнге созылған іріктеу кезеңде күш-жігерін аямай, барын салып текетіресті.      

Шара соңында жүлдегерлер мен жеңімпаздар мадақтама қағаздарымен қатар медаль, арнайы кубокпен және бағалы сыйлықтармен марапатталды. Еске салайық, әскери-патриоттық жастар жиыны ағымдағы жылдың 18-24 маусым аралығында Қарағанды облысындағы Қазақстан Республикасы Қарулы күштерінің «Спасск» оқу орталығында өтеді. 

Абай өңірлік гарнизонының баспасөз қызметі