Туристік маусым басталғаннан бері полицейлер 110 хабарлама мен шақыртуға ден қойып, түрлі жағдайларға тап болған ондаған туристке көмек көрсетті. Сондай-ақ адасып кеткен 95 бала ата-анасына аман-есен табысталды.

Қызмет барысында 1014 әкімшілік құқық бұзушылықтың жолы кесілді. Ең көп тіркелген құқық бұзушылықтар қоғамдық тәртіпті бұзу және жол қозғалысы қағидаларын сақтамауға қатысты болды.

Көлік құралдарын мас күйінде басқару деректері ерекше алаңдаушылық туғызады. Осы кезеңде полиция қызметкерлері мас күйінде көлік басқарған 24 жүргізушіні анықтап, оларды көлік басқарудан шеттетіп, Қазақстан Республикасының заңнамасына сәйкес жауапкершілікке тартты.

Полиция курорттағы қауіпсіздік тек полиция қызметкерлерінің жұмысына ғана емес, әрбір демалушының жауапкершілігіне де байланысты екенін еске салады. Полицейлер азаматтарды қоғамдық тәртіпті сақтауға, жол қозғалысы қағидаларын қатаң ұстануға, балаларды қараусыз қалдырмауға және қабылданып жатқан қауіпсіздік шараларына түсіністікпен қарауға шақырады.