Қазақстанда халықтың денсаулығын нығайту, аурулардың алдын алу және азаматтарды белсенді өмір салтына тарту бағытында жүйелі жұмыстар жүргізілуде. Салауатты өмір салты тек спортпен айналысумен шектелмей, дұрыс тамақтану, тұрақты дене белсенділігі, сапалы демалыс, жеке гигиена және зиянды әдеттерден бас тартуды қамтиды.

Бұл бағытта әсіресе балалар мен жастарға ерекше көңіл бөлінуде. Мектептер мен жастар ұйымдарында спорттық жарыстар, эстафеталар, туристік жорықтар, ашық аспан астындағы ойындар және түрлі профилактикалық акциялар тұрақты ұйымдастырылып келеді. Мұндай шаралар жас ұрпақты дене белсенділігіне баулып қана қоймай, олардың ұйымшылдық, жауапкершілік және көшбасшылық қасиеттерін қалыптастыруға ықпал етеді.

Спорт пен дене белсенділігі – салауатты өмір салтының негізгі құрамдас бөлігі. Жүгіру, жүзу, велосипед тебу, гимнастика, ұлттық спорт түрлері немесе күнделікті серуендеу адамның белсенділігін арттыруға мүмкіндік береді. Мемлекеттік деңгейде бұқаралық спортты дамыту және спорттық инфрақұрылымның қолжетімділігін арттыруға бағытталған жұмыстар да жалғасуда.

Сонымен қатар дұрыс тамақтану мәдениетін қалыптастыруға да мән беріліп келеді. Ұлттық зерттеу деректеріне сәйкес, күн сайын кемінде 400 грамм жеміс пен көкөніс тұтынатын қазақстандықтардың үлесі 2015 жылғы 34,3 пайыздан 2024 жылы 41,7 пайызға дейін өскен. Бұл халық арасында дұрыс тамақтану дағдыларының біртіндеп қалыптасып келе жатқанын көрсетеді.

Салауатты өмір салтын қалыптастырудың маңызды бөлігі – темекі, алкоголь және есірткі сияқты зиянды әдеттердің алдын алу. Бұл бағытта ақпараттық-түсіндіру жұмыстары жүргізіліп, жастарды спортқа, шығармашылыққа және пайдалы қоғамдық қызметке тартуға басымдық берілуде.

Жалпы, салауатты өмір салтын насихаттау – азаматтардың денсаулығын сақтаумен қатар, дені сау, белсенді әрі жауапты қоғам қалыптастыруға бағытталған маңызды мемлекеттік және қоғамдық міндет. Денсаулыққа жауапкершілік әр адамның өзінен басталады. Сондықтан күнделікті қозғалыс, дұрыс тамақтану, жеткілікті демалыс және зиянды әдеттерден аулақ болу – ұзақ әрі сапалы өмір сүрудің басты негіздерінің бірі.