Абай облысында Достық үйінің директоры зейнет демалысына шықты

Бүгін, 09:00 Думан Кенжеғазыұлы

Бүгін облыс әкімі Берік Уәли «Қоғамдық келісім орталығы – облыстық Достық үйінің» директоры, өңірдің қоғамдық саласына еңбек сіңірген Надежда Шарованы зейнет демалысына салтанатты түрде шығарып салу рәсіміне қатысты.

Аймақ басшысы Надежда Васильевнаның өңірдің қоғамдық-саяси өміріне белсене араласып, білім беру, мемлекеттік қызмет, ақпарат және қоғамдық келісім салаларында ұзақ жылдар абыройлы еңбек еткенін атап өтті.

«Надежда Васильевна, Сіздің басқарушылық қызметтегі мол тәжірибеңіз, елдің дамуына қосқан зор үлесіңіз алдағы уақытта да облысымыздың дамуына керек, сондықтан, өңіріміздің қоғамдық өміріне белсенді араласып, өз үлесіңізді қоса бересіз деген сенімдеміз. Сіз өңірдің қоғамдық-саяси өміріне белсене араласып, әр жылдары жауапты қызметтерді абыроймен атқардыңыз. Көп жылғы адал еңбегіңіз бен Абай облысының дамуына қосқан үлесіңіз үшін шынайы алғысымды білдіремін. Зейнетіңіз құтты болсын! Сізге зор денсаулық, отбасыңызға амандық пен бақ-береке тілеймін», – деді Берік Уәли.

Надежда Шаровамен әр жылдары қызметтес болған әріптестері де оның кәсіби біліктілігі мен қоғамдық бастамаларға белсенді араласқанын жеткізді.

«Надежда Васильевнамен түрлі мәселелер бойынша тығыз жұмыс істедік. Достық үйінде этножурналистика қоғамдық клубының төрайымы болған тұста да жақсы бастамалары болды. Сол Достық үйіндегі бірлестіктердің өзара ынтымақта, береке-бірлікте жұмыс жасауына ұйытқы бола білді. Өте мемлекетшіл тұлға. Жанына жастарды көп жинайды. Надежда Васильевнаның мол тәжірибесі алдағы уақытта да қоғамдық жұмыстарда қажет болады деп ойлаймын», – деді облыстық «Semei» телеарнасының бас редакторы Сайра Нүсіпбаева.

Надежда Шарова еңбек жолын 1987 жылы Көкпекті ауылындағы Киров атындағы мектепте тарих және қоғамтану пәнінің мұғалімі болып бастаған. Әр жылдары Көкпекті ауданының ішкі саясат бөлімінде бас маман, бөлім басшысы, ауданның ішкі саясат, мәдениет және тілдерді дамыту бөлімінің басшысы, аудан әкімі аппараты бақылау бөлімінің басшысы қызметтерін атқарды. 2010-2015 жылдары «Жұлдыз» – «Новая жизнь» аудандық газетінің бас редакторы, 2015-2019 жылдары Семей қаласы әкімінің орынбасары болды. Кейін Семей қалалық Достық үйін басқарды. 2023 жылдың наурыз айынан бастап Абай облысының «Қоғамдық келісім орталығы – облыстық Достық үйінің» директоры қызметін атқарды.

Тағыда оқыңыз

Қасым-Жомарт Тоқаев: «Мақсатым – экономиканы және егемендікті нығайту»Қазақстан Республикасының Президенті Қасым-Жомарт Тоқаев: ҚАЗАҚСТАН ЖАҢҒЫРУДЫҢ ЖАҢА КЕЗЕҢІНЕ ҚАДАМ БАСТЫ Мемлекет басшысы Қасым-Жомарт Тоқаевтың Ұлттық құрылтайдың «Адал адам – Адал еңбек – Адал табыс» атты үшінші отырысында сөйлеген сөзі Мемлекет басшысы Қасым-Жомарт Тоқаевтың Ұлттық құрылтайдың төртінші отырысында сөйлеген сөзі Мемлекет басшысы Қасым-Жомарт Тоқаевтың Қазақстан халқына жолдауы «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу»

Бізге ақпарат жолдаңыз Телеграмдағы каналымыз

Абай облысында Достық үйінің директоры зейнет демалысына шықты

Пікірлер (0)