Облыс әкімі Берік Уәли Бесқарағай ауданындағы Беген филиалына қарасты Дөңгелек орманшылығындағы өрт сөндіру станциясының ашылу рәсіміне қатысты.

Бесқарағай – облыстағы орман қоры мол аудандардың бірі. Аудан аумағында «Семей орманы» мемлекеттік орман табиғи резерватының 6 филиалына қарасты 390 мың гектар орман алқабы орналасқан. Орман шаруашылығы саласында 1074 адам еңбек етеді.

Орман өрттерінің алдын алу және төтенше жағдай кезінде жедел әрекет ету мүмкіндігін арттыру мақсатында «Семей орманы» МОТР» РММ аумағында II типті төрт жаңа орман өрт сөндіру станциясы ашылды. Оның бірі Бөкебай филиалының Шадруха орманшылығында, екіншісі Беген филиалының Дөңгелек орманшылығында орналасқан. Сондай-ақ Жетіжар және Беген ауылдарында өрт сөндіру бекеттері пайдалануға берілді.

Әр станцияның жалпы ауданы 330 шаршы метрді құрайды және 5 өрт сөндіру техникасын орналастыруға арналған. Дөңгелек орманшылығындағы жаңа станцияда 41 адам еңбек етеді. Нысан орман өрттеріне жедел ден қоюға және арнайы техниканың тұрақты дайындығын қамтамасыз етуге мүмкіндік береді.

Облыс әкімі орман алқаптарын өрттен қорғау үшін қажетті инфрақұрылымды дамыту мен материалдық-техникалық базаны нығайту жұмыстары жалғаса беретінін атап өтті.

Жаңа өрт сөндіру бекетінің ашылуына тұрғындар мен орман шаруашылығы саласының ардагерлері де ерекше қуанышын білдірді.