Бүгін облыс әкімі Берік Уәли Бесқарағай ауданының тұрғындарымен кездесіп, өңірдің және ауданның әлеуметтік-экономикалық дамуы, атқарылған жұмыстар мен алдағы жоспарлар туралы халыққа есеп берді.

Жиында алдымен Бесқарағай ауданының әкімі Ділдар Қалиқан ауданның 2025-2026 жылдардағы әлеуметтік-экономикалық даму көрсеткіштері туралы баяндады. Аймақ басшысы өңір экономикасының негізгі көрсеткіштеріне тоқталып, ауданда жүзеге асырылып жатқан жұмыстарды атап өтті.

Бесқарағай ауданында ауыл шаруашылығы өнімдерінің көлемі 16,9 млрд теңгені құрады. Егіс алқабы – 67,5 мың гектар. 9 қыркүйектегі мәлімет бойынша 12,4 мың гектар дәнді және дәнді-бұршақты дақыл жиналып, 11,5 мың тонна астық бастырылды. Биыл аудан шаруалары 38 жаңа ауыл шаруашылығы техникасын сатып алды.

Жалпы биыл ауданда 11,3 млрд теңгеге 8 инвестициялық жобаны жүзеге асырып, 185 жұмыс орнын құру жоспарланып отыр. Қазір «Qazaq Onimi» компаниясының 416 гектар жерге 720 млн теңгеге суару жүйесін орнату жобасы іске қосылып, 10 жұмыс орны құрылды.

Туризм саласында Шипалы көл аумағындағы санаторийге электр желісі тартылуда. Ескі бекініс ауылындағы «KISLOROD» демалыс базасында туристік және балық шаруашылығы қатар дамытылып, «Zhylandy Eco Village» демалыс базасын кеңейту жоспарланып отыр.

Ауданның инфрақұрылымын жақсарту бағытында Морозовский орман шаруашылығы, Жыланды, Мостик, Башкөл және Малая Владимировка ауылдарына су берілді. Кривинка мен Глуховкада құрылыс жалғасуда. Канонерка, Бозтал және Белокаменка ауылдарында су құбырлары салынып жатыр. Бес ауылда көше жарықтары ауыстырылды.

Кривинка, Жетіжар, Долон және Бөдене ауылдарындағы жалпы ұзындығы 9 шақырым болатын 8 көше жөнделді. «Канонерка – Белокаменка» автомобиль жолының 8,5 шақырымын жөндеу басталды.

Тұрғын үй мәселесін шешу үшін жеке құрылыс салушылар есебінен жаңа шағын аудан салынып жатыр. Мұнда 20 екіпәтерлі тұрғын үй, яғни 40 пәтер салу жоспарланған.

Білім саласында ауданның 9 мектебінде ағымдағы жөндеу жүргізілуде. «Қазақстан халқына» қорының қолдауымен 7 шағын жинақты мектепке 12 мамандандырылған кабинет жабдықталды. «Жасампаз ұрпақ» жобасы аясында Бесқарағай шығармашылық үйі заманауи кабинеттермен жабдықталды. Төрт мектепке жаңа автобус беріледі.

«Ауылдық денсаулық сақтауды жаңғырту» ұлттық жобасы аясында ауданда 11 алғашқы медициналық-санитарлық көмек нысаны пайдалануға берілді. Аудандық ауруханаға 22,2 млн теңгеге жаңа медициналық техника сатып алу көзделген. Сондай-ақ облыс әкімі 1 JAC Sunray және 2 «ГАЗель-NEXT» санитариялық автокөлігін арнайы табыстады.

Бесқарағай ауылында бассейн, Ерназар ауылында спорттық модуль салынып жатыр. Ауылдық кітапханалар базасында 56,2 млн теңгеге «Жаңа клуб» комьюнити-орталығын құру жобасы жүзеге асырылуда.

Цифрлық инфрақұрылымды дамыту аясында «Қазақтелеком» АҚ 2026-2027 жылдары ауданның 21 ауылына талшықты-оптикалық байланыс желісін тартуды жоспарлап отыр. Қазір 12 ауылда тиісті жұмыстар жүргізілуде. Сонымен қатар «Омбы – Павлодар – Семей – Майқапшағай» автожолының бойына 3 антенна-діңгек құрылғысын салу көзделген.

Аймақ басшысы аудандағы өзекті мәселелерді кезең-кезеңімен шешу жұмыстары жалғаса беретінін атап өтті.

Кездесу соңында тұрғындар өздерін толғандырған сауалдарын қойды. Облыс әкімі көтерілген мәселелер мен ұсыныстардың назардан тыс қалмайтынын айтты.

Бұдан бөлек, аймақ басшысы аудан тұрғындарын жеке мәселелері бойынша қабылдады. Онда ауыл шаруашылығын мемлекеттік қолдау, «Ауыл аманаты» бағдарламасы және мектепке дейінгі білім беру мәселелері көтерілді.