Конституцияның 25-бабы: сенім мен таңдау еркіндігі
Жаңа Конституцияның 25-бабы әр адамның ар-ождан бостандығына кепілдік береді. Бұл норма азаматтардың діни сенімін, жеке көзқарасы мен дүниетанымын еркін таңдау құқығын айқындайды. Яғни әр адам қандай да бір дінді ұстануға немесе ешбір дінді ұстанбауға ерікті.
Аталған бап екі тармақтан тұрады. Біріншісінде әр адамның ар-ождан бостандығына құқығы бар екені нақты көрсетілген. Ал екінші тармаққа сәйкес, бұл құқықты жүзеге асыру өзге адамдардың құқықтары мен бостандықтарын, сондай-ақ мемлекет алдындағы міндеттерді шектемеуге тиіс.
Осылайша, Ата Заңның 25-бабы жеке адамның сенім еркіндігін қамтамасыз етумен қатар, қоғамдағы өзара құрмет пен жауапкершіліктің маңызын айқындайды. Бұл норма әртүрлі көзқарас пен наным-сенім өкілдерінің құқықтарын құрметтеудің конституциялық негізін қалыптастырады.