Қазақстан Республикасының Швейцария Конфедерациясындағы және Лихтенштейн Княздігіндегі қоса атқарушы Елшісі Қайрат Саржанов Алоиз Филипп Мария фон унд цу Лихтенштейн Мұрагер ханзадасына сенім грамоталарын тапсырды.

Вадуц сарайындағы салтанатты рәсімі барысында қазақстандық дипломат Мұрагер Ханзадаға Президент Қасым-Жомарт Тоқаевтың атынан жылы лебіздерін жеткізіп, қазақстандық тараптың Лихтенштейнмен өзара тиімді байланыстарды кеңейтуге мүдделілігін білдіріп, Қазақстандағы саяси және әлеуметтік-экономикалық жаңғырту үрдістері туралы хабардар етті.

Өз кезегінде, Мұрагер Ханзада Лихтенштейннің екіжақты өзара іс-қимылды тереңдетуге дайындығын білдіріп, Қазақстан басшылығы мен халқына алға қойылған мақсаттарды іске асыруда табыс тіледі.

Лихтенштейннің Сыртқы істер министрі Доминик Хазлермен жеке кездесу барысында тараптар екіжақты ынтымақтастықтың өзекті мәселелерін, дамуға ресми көмек көрсету жөніндегі ұлттық агенттіктер арасында байланыс орнату мүмкіндігін талқылады.