2023 жылдың 9 айының қорытындысы бойынша Қазақстан мен Әзірбайжан арасындағы сауда көлемі 417,4 млн. долларға жетті. Бұл көрсеткіш, өткен жылдардың ұқсас кезеңімен салыстырғанда, рекордтық болып табылады, сондай-ақ 2022 жылдың 9 айындағы көрсеткіштен (316,4 млн.долл.) 31,9%-ке артық.

Бұл ретте, елдер арасындағы сауданың едәуір үлесі Қазақстаннан экспортқа тиесілі – 360,1 млн доллар немесе 86,3%. Қазақстаннан Әзірбайжанға экспорт көлемі 2022 жылғы қаңтар-қыркүйекте 256,2 млн доллардан 40,5%-ке өсті.

Осы кезеңдегі Әзірбайжаннан импорт көлемі 57,3 млн долларды құрады.

Қазақстан экспортының өсуі өңделмеген алюминийді жеткізудің 201 мың доллардан 108,2 млн долларға дейін 538,2 есеге ұлғаюымен байланысты.

Осылайша, алюминий экспорттың жалпы көлемінің 30%-ін ала отырып, Қазақстанның Әзірбайжанға негізгі экспорттық тауарына айналды. Экспорттың өсуіне мұнай өнімдерін жеткізудің 61,1 миллион доллардан 74,9 миллион долларға дейін және шикі мұнайдың 56,7 миллион доллардан 73,2 миллион долларға дейін өсуі де әсер етті.

Бұдан басқа, Қазақстан Әзірбайжанға бидай, рельстер, металпрокат, аккумуляторлар, теміржол вагондары, нан және ұн өнімдері, макарон, маргарин және т.б. жеткізеді.

Әзірбайжаннан импортталатын негізгі тауарлар қатарларына қара металдардан жасалған құбырлар мен профильдер (16,2 млн.долл.), паромдар мен круиздік кемелер (11,6 млн.долл.), ауыз су, оның ішінде минералды және газдалған су (9,3 млн.долл.) жатады. Аталған үш тауар тобы Әзербайжаннан келетін барлық импорттың 64,8%-ін құрайды.

Әзірбайжан мен Қазақстанның инвестициялық ынтымақтастығы

2023 жылдың 1 жартыжылдығында Әзірбайжаннан Қазақстанға тікелей шетелдік инвестициялардың жалпы ағынының көлемі 1,2 млн долларды құрады.

Қазақстанға Әзірбайжан инвестицияларының негізгі бөлігі энергетика секторында, атап айтқанда мұнай-газ саласында шоғырланғанын атап өткен жөн.

Бұл ретте, Каспий теңізінің түбіне талшықты-оптикалық байланыс желісін (ТОБЖ) төсеу жобасы тараптар іске асыратын аса маңызды жобалардың бірі болып табылады.

Жоба Қазақстанға ғаламдық интернет желісіне қосылу үшін баламалы байланыс арналарының болуына мүмкіндік береді. Оның құны 22,8 млрд. теңгеге бағаланады.