Бүгін Парламент Сенатының пленарлық отырысында Ұлттық экономика министрі Әлібек Қуантыров «ҚР Ұлттық қорынан 2024–2026 жылдарға арналған кепілдендірілген трансферт туралы» Заң жобасын таныстырды. Заң жобасы Бюджет кодексінің жаңа талаптарын ескере отырып әзірленді.

ҰЭМ басышсы атап өткендей, кепілдендірілген трансферттің мөлшері екінші жыл бюджеттік қағидаларды қолдана отырып анықталуда. Бұл қағидалар Ұлттық қор қаражатының сақталуын қамтамасыз етуге және оның валюталық активтерін 2030 жылға қарай $100 млрд. дейін жеткізуге ықпал етеді.

-Мұнайдың кесімді бағасы 2024 жылы барреліне $43,4, 2025-2026 жылдары барреліне $40,2–$41,8 деңгейінде белгіленген. Осыны ескере отырып, Ұлттық қордан кепілдендірілген трансферттің мөлшері 2023 жылы 2,2 трлн. теңгеден 2024-2026 жылдары жыл сайын 2 трлн. теңгеге дейін төмендеумен айқындалды, - деп хабарлады министр.

ҚР ҰЭМ деректері бойынша, жоспарлы кезеңде Ұлттық қордың валюталық активтері 2024 жылы $68 млрд. дейін қалпына келтіріліп, одан әрі 2025-2026 жылдары $80,7–$93,3 млрд. дейін өседі деп болжанады.