Абай облысында жастар үшін шағын гранттар конкурсы – «ZHAS PROJECT» жобасы басталды. Өңірге 8 грант бөлінген. Өтінімдерді қабылдау 25 наурызда басталып, бір айға созылады. Бұл туралы конкурсты ұйымдастырушылар мен «Абай жастары» жастар ресурстық орталығының бөлім басшысы Ерcінбек Өрлеубек хабарлады.

Конкурс талаптарына сәйкес үміткерлер аймақта тұратын жұмыссыз жастар болуы керек. Жоба жеңімпаздары 1 миллион теңгеге дейін қаражатқа және тәлімгерлердің қолдауына ие болады. Жастарға жобаларын іске асыруға төрт ай беріледі.

Спикерлердің айтуынша, шағын гранттарды іске асыру барысында жастарға ұйымдастырушылық және консультациялық қолдау көрсетілетін болады. Сондай-ақ білікті жаттықтырушылар, тәлімгерлер және әлеуметтік жобаларды дамыту жөніндегі мамандар шақырылады.