Қарулы күштер Ұлттық әскери-патриоттық орталығының Алматы қаласындағы филиалында «Еуразия» бірінші арнасының Х-Factor Kazakhstan телевизиялық мегажобасының тоғызыншы маусымының жеңімпазы Мирас Ерболов жеке концерт қойды.

Қазақстандық эстрада жұлдызымен кездесуге Қорғаныс министрлігінің жоғары әскери оқу орындарының курсанттары, Б. Момышұлы атындағы «Жас ұлан» республикалық мектебінің және «Жас сарбаз» әскери-патриоттық қозғалысының тәрбиеленушілері келді. 

Жарты жыл ішінде Қазақстанның барлық өңірлерінің атынан бірнеше мың үміткер финалға жету үшін неше түрлі сыннан өтті. Гранд-финалға үш әнші шықты. Олардың арасында әскери қызметші – «Шығыс» өңірлік қолбасшылығы Абай гарнизонындағы офицерлер үйі эстрадалық-би бөлімінің меңгерушісі кіші сержант Мерхат Қанапиянов та бар.

Бұрын дене шынықтыру мұғалімі болған Мирас Ерболовтың жетістігіне концертке қатысқан Қарулы күштер Ұлттық әскери-патриоттық орталығының Алматы филиалының музыкалық жетекшісі Гүлжиян Оспанова ықпал етті. Ол вокал маманы ретінде Гүлжияннан сабақ алған. Бір жарым ай бойы алған сабақтың нәтижесінде осындай жеңіске жетті. 

X-Factor Kazakhstan жеңімпазы Мирас Ерболовпен кездесу керемет өтті. Әнші өзі, хоббиі, мұғалім жайлы айтып берді. Ал болашақ офицерлер оған өнер көрсеткені үшін алғыс айтып, шығармашылық табыс тіледі.