Бүгін Орталық коммуникациялар қызметінің алаңында ЦДИАӨМ өкілдері Қазақстандағы жасанды интеллекттің одан әрі дамуы туралы айтты.

Ұлттық жасанды интеллект платформасының операторы ретінде «ҰАТ» АҚ жасанды интеллект технологияларын дамытуда және Қазақстан экономикасының әртүрлі секторларына біріктіруде орталық рөл атқаратын болады.

Жасанды интеллект платформасы үлгілерді жасауға, біз әзірлеген деректер жиынын сақтауға, сонымен қатар MLOPS құралдары мен есептеу қуатын қамтамасыз етуге арналған. Ұлттық жасанды интеллект платформасы жай ғана технологиялық инфрақұрылым емес, ол Қазақстанға аймақтағы жасанды интеллект саласында жетекші орын алатын инновациялар мен дамудың катализаторы болып табылады.

Қазіргі уақытта AI платформасының архитектурасын құру, оның құрамдас бөліктерін әзірлеу, сынақтан өткізу және құжаттаманы дайындау бойынша белсенді жұмыс жүргізілуде. «ҰАТ» АҚ мемлекетке, бизнеске, ғылымға, білімге жасанды интеллект негізіндегі инновациялық шешімдерді әзірлеу және енгізу үшін AI платформасын ұсынады, бұл процестерді автоматтандыруды дамытуға, мемлекеттік және коммерциялық қызметтердің сапасы мен қолжетімділігін арттыруға ықпал етеді.

Бұл ретте министрлік сарапшылар қауымдастығымен және Қазақстан Республикасы Парламенті Мәжілісінің Парламентаризм институтымен бірлесіп цифрландырудың жетекші қағидаттарын белгілейтін кешенді салалық құжатты әзірлеу жұмыстарын жүргізуде. Цифрлық кодты әзірлеу 2024 жылға арналған Заңнамалық жұмыс жоспарының жобасына енгізілген. Бұл құжат келесі блоктардан тұрады: жалпы ережелер (тұжырымдамалық аппарат, негізгі міндеттер мен қағидаттар, құқықтық қатынастардың субъектілері мен объектілері, құқықтар мен міндеттер), негізгі бөлім (цифрлық үкімет, деректер, ЖИ, цифрлық инфрақұрылым және құралдар, киберқауіпсіздік).

Экономика секторлары ақпараттық технологияларды, қаржылық қызметтерді, денсаулық сақтауды, энергетиканы және өндірісті қоса алғанда, AI-дан айтарлықтай пайда көретінін атап өткен жөн.

Сондай-ақ, Мемлекет басшысының тапсырмасы бойынша 2024 жылдың соңына дейін «Самұрық-Қазына» Ұлттық әл-ауқат қоры мен «Group 42» компаниясымен бірлесіп, ең заманауи технологияларды пайдаланатын суперкомпьютер іске қосылады.

Цифрлық даму министрлігінің көзқарасы мамандандырылған деректерді өңдеу орталықтарында орналастыру арқылы есептеу қуатын жалға алу және сатып алу түріндегі технологиялық инфрақұрылымды (суперкомпьютер) салуды көздейді. Жасанды интеллект үшін қажетті есептеу ресурстарының көлемі мемлекеттік органдардың, жоғары оқу орындарының, академиялық ортаның және жеке сектордың қажеттіліктерімен анықталады.

Суперкомпьютерді пайдаланған кезде өңделетін ақпаратты қорғау үшін қолданылатын операциялық жүйелерге, деректерді сақтау жүйелеріне, желілік құрылғыларға орнатылған ақпараттық қауіпсіздіктің стандартты технологияларын пайдалану, сондай-ақ ақпаратты қорғаудың дәстүрлі әдістері мен құралдарын пайдалану жоспарлануда.

Суперкомпьютер AI үлгілерін әзірлеуге қызмет етеді және AI саласындағы есептеу ресурстарына өсіп келе жатқан сұранысты қанағаттандыра отырып, AI өнімдерін жасауда ғылыми, академиялық және коммерциялық пайдалану үшін қол жетімді болады.

Сонымен қатар, технологиялық инфрақұрылымды (суперкомпьютер) іске қосу AI дамыту саласындағы Қазақстанның Орталық Азиядағы көшбасшылығын анықтайды және отандық компаниялар мен көршілес елдерге есептеу қуатын жалға алу мүмкіндігін береді.