Су тасқыны орын алған кезден бастап Оқу-ағарту министрлігі оқу процесін сапалы ұйымдастыру және балаларды орналастыру бойынша жұмыстарды жүйелі жүргізіп келеді. Бүгінгі таңда эвакуациялық пунктердегі 4 мыңға жуық бала тұру және оқу үшін қолайлы орынжайларға ата-аналарымен бірге орналастырылды, оның ішінде 600-ге жуық оқушы сауықтыру орталықтарына, 2 мыңға жуық бала колледждер мен жоғары оқу орындарының жатақханаларына, 600-ге жуық бала республикалық маңыздағы инновациялық мектеп-лицей жатақханаларына орналастырылды. Бұл туралы ҚР ОАМ ресми өкілі Мереке Амангелдіқызы ОКҚ брифингінде хабарлады.

Резерв ретінде балалар мен олардың ата-аналары үшін қосымша 7094 орын әзірленді. Оқушылар қажетті оқу құралдарымен, тамақтанумен және киіммен қамтамасыз етілді. Қазақстан темір жолымен бірге балаларды сауықтыру орталықтарына тегін тасымалдау ұйымдастырылды. 

«Сонымен қатар, зардап шеккен өңірлердегі балалар үшін емтихан тапсыру мерзімдері қайта қаралды. Бұдан бұрын Ақтөбе және Атырау облыстарында ТЖБ мен БЖБ өткізілмейтіні хабарланды. Бүгінгі таңда Солтүстік Қазақстан облысының зардап шеккен ауылдарында тұратын балалар үшін де ТЖБ мен БЖБ алып тастау туралы шешім қабылданды. Ақмола және Батыс Қазақстан облыстарында шешім жағдайға қарай қабылданатын болады»,-деді спикер. 

Қазіргі уақытта келтірілген шығынды анықтау және су тасқынынан зардап шеккен педагогтердің тізімін құру жұмыстары жүргізілуде. Жекеменшік білім беру ұйымдарының қауымдастығы зардап шеккендерге көмек қорын ашты. Ұсынылған деректерге сәйкес, бүгінгі таңда 12 млн теңгеден астам қаржы жиналған.