Дала жұмыстарына 51 шаруашылық субъекті қатысады, - деп хабарлайды 018.kz тілшісі Мадина Айдарова Абай облысы әкімдігінің баспасөз қызметіне  сілтеме жасап.

Сонымен қатар жеке аулаларда ауыл шаруашылығы дақылдары егіледі. Аталған алқапта 1 567 га дәнді дақыл, 1 049 га картоп, 471 га көкөніс және бақша, 5 142 га майлы дақыл өсіріледі.

2024 жылы өңірдің шаруашылықтары сапалы тұқыммен қамтамасыз етілмек. 1 567 га алқапқа дәнді дақыл егу үшін 176 тонна тұқымды шаруашылықтар субсидияланған өз қаражаты есебінен сатып алуда. Сонымен қатар 85 тонна күнбағыстың, 13 тонна бір жылдық және 12,6 тонна көпжылдық шөптердің тұқымы сатып алынады. Бүгінде субсидия алу үшін қажетті құжаттар әзірленуде.

Осы мақсатта 1-2 классты және ІІІ репродукциядан төмен емес тұқымдар пайдаланылады. Тұқымның сапасы мен себуге жарамдылығын анықтау мақсатында, кестеге сәйкес сәуір айында «Қазагроэкс» АҚ зертханасына 280 тұқымдық сынама тексеріске жіберілді. Өңірдің ауыл шаруашылық құрылымдары субсидияланатын 1 005 тонна минералдық тыңайтқышқа өтінім берген, бұл 2023 жылмен салыстырғанда 57% артық.

Қазіргі уақытта көктемгі дала жұмыстарына қажетті техникалар соңғы дайындықтарын жүргізуде. Өңірде техника жеткілікті, оның ішінде тракторлардың барлық түрі бар. Соның 624-і дөңгелекті, 62-і шынжыртабанды. Одан бөлек 71 соқа, 56 культиватор, 36 тұқым сепкіш және 239 жүк көлігі бар.