Қазақстан Қарулы күштерінің әскери қызметшісі майор Мақсұт Жұмаев Эверестке үшінші рет көтерілді
Құрамында белгілі альпинист, ҚР Қарулы күштері тау дайындығы орталығының нұсқаушысы майор Мақсұт Жұмаев пен Анар Бурашева бар қазақстандық «Kazakh Everest Team» командасы әлемнің ең биік шыңына сәтті көтерілді.
«Kazakh Everest Team» спорттық-патриоттық экспедициясына қатысушылар Эверест шыңын бағындыруды Ұлы Отан соғысының батырлары Сағадат Нұрмағамбетов, Рақымжан Қошқарбаев және Әлия Молдағұловаға арнағанын естеріңізге саламыз. Құрамында жеті адам бар командаға Қазақстан Қарулы күштері тау дайындығы орталығының нұсқаушысы майор Мақсұт Жұмаев басшылық жасады.
Бес тәулікке созылған шыңға көтерілу 7 мамыр күні 5 350 метр биіктіктегі базалық лагерьден басталды.
8 000 метрден жоғары биіктіктегі дауыл мен боран түріндегі күрделі ауа райына байланысты шыңды бағындыруға ниеттенген экспедициялардың көпшілігі бағытынан кері қайтқан. Тек бес елдің альпинистері Эверестке сәтті көтеріле алды. Олардың арасында тарихта әлемнің ең биік шыңына шыққан тұңғыш қазақ қызы Анар Бурашева мен Эверестке үшінші рет көтерілген Мақсат Жұмаев бар.