Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу Шанхай ынтымақтастық ұйымына мүше мемлекеттердің Сыртқы істер министрлері кеңесінің отырысы аясында Тәжікстан Республикасының, Пәкістан Ислам Республикасының, Беларусь Республикасының сыртқы саяси ведомстволарының басшылары –Сироджиддин Мухриддинмен, Мохаммад Исхак Дармен және Сергей Алейникпен екіжақты кездесулер өткізді.

Келіссөздер барысында аталған елдермен саяси, сауда-экономикалық және мәдени-гуманитарлық ынтымақтастықты одан әрі кеңейтуді қоса алғанда, екіжақты, өңірлік және халықаралық күн тәртібіндегі басты мәселелер қаралды.

М.Нұртілеу Тәжікстан СІМ басшысымен кездесуде қазақ-тәжік стратегиялық әріптестігі мен одақтастығын одан әрі нығайту перспективаларын талқылады. Алдағы аса жоғары және жоғары деңгейдегі іс-шараларға ерекше назар аударылды.

Пәкістан министрімен келіссөздер барысында тараптар өзара қызығушылық тудыратын мәселелердің кең ауқымы бойынша екіжақты ынтымақтастығының қазіргі жағдайы мен перспективаларын талқылады. Қазақстан-Пәкістан үкіметаралық комиссиясының 13-ші отырысын өткізуді қоса алғанда, әртүрлі деңгейдегі сапарлармен алмасу арқылы екіжақты өзара іс-қимылды жандандыру қажеттігі аталып өтті.

Беларусь сыртқы саяси ведомствосының басшысымен кездесу барысында өзара іс-қимылдың барлық спектрі бойынша Қазақстан-Беларусь қатынастарының даму динамикасына жоғары баға берілді. Тараптар екі елдің тиімді ынтымақтастығын одан әрі дамытуға қолдау көрсету мақсатында барлық деңгейлерде тығыз өзара іс-қимылды жалғастыру ниетін растады.