Абай облысы кәсіподақтар орталығының бастамасымен «Лайықты еңбек жылы» аясында Абай облысы бақылау басқармасының (МСҚБ, еңбек инспекциясы) бөлім басшысы Тоқтарбек Түсіпбаев, Абай облысы Полиция департаменті  ЖПҚБ басшысы Әсет Өтепов, Абай облысының Денсаулық сақтау басқармасының басшысы Талғат Молдабеков және «Абай облысы кәсіподақтар орталығы» аумақтық кәсіподақтар бірлестігінің төрайымы Зәуреш Исабаева өзара ынтымақтастық туралы Меморандумға қол қойды.

Меморандум аясында Қазақстан Республикасы еңбек заңнамасының сақталуын бақылау, жасырын өндірістік жарақатты болдырмау және жазатайым оқиғаларды уақытында тексеріп, нақты есеп жүргізу үшін жұмыс берушілердің заңды құқықтарын сақтай отырып, еңбек шарттарын жасасу және жалақы төлеу туралы талаптарды жұмыс беруші бұзған жағдайларда жұмысшылардың әлеуметтік қорғалуын қамтамасыз ету мақсатында өзара әрекеттесу қаралған.

Тараптар консультациялар жүргізуге, болашақ іс-шараларды белгілеуге және анықтауға немесе осы оқиғаларға қатысты мәселелерді талқылауға құқығы бар осы Меморандумның талаптарын орындауды үйлестіру үшін Жұмыс тобын құруға келісті.

Өзара ынтымақтастық ұйымдардың қызметкерлері мен халық арасында өндірістік жарақаттануға ықпал ететін себептер мен жағдайлар, жарақаттанудың алдын алу әдістері және өндірістік жарақатты жасырудың салдары туралы белсенді түсіндіру жұмыстарын жүргізуді, еңбек заңнамасын және қауіпсіз жұмыс мәселелері бойынша оқытуды ұйымдастыруға қатысуды қарастырады.

Осы Меморандум аясында Абай облысының кәсіпорындары мен ұйымдарында өндірістік жарақаттану фактілерін уақтылы және дұрыс тергеп-тексеру бойынша бірлескен іс-шаралар мен семинарлар, сондай-ақ жұмыс берушілер мен қызметкерлер өкілдері арасында өндірістік жарақаттану фактілерін жасыруға жол бермеу туралы түсіндіру жұмыстары жүргізілетін болады.