Қала тұрғындары тарапынан теміржол өткелдеріне байланысты мәселе жиі көтеріледі. Осыған байланысты аймақ басшысы Нұрлан Ұранхаев шаһардағы бірнеше теміржол өткелдерінде болып, тиісті орган өкілдерімен бірге халықтың еркін қатынауына жағдай жасау бойынша кеңесті.

Бүгінгі таңда облыс орталығында 26 теміржол өткелі бар. Оларды күтіп ұстау, бүлінген жерін қалпына келтіру «ҚТЖ» ҰҚ» АҚ магистральдық желісінің Семей бөлімшесінің міндетіне кіреді.

Алдымен Рысқұлов көшесіндегі (905 құрылыс, Треугольник ауданы) теміржол өткеліне аялдаған аймақ басшысы мәселенің мән-жайымен танысып, оңтайлы шешудің жолдарын қарастырды. Теміржол өткелі пойыз өтер алдында ұзақ уақытқа жабылып, тұрғындардың шыдамын тауысатындығы бар. Бұл учаске бойынша ақпарат берген «ҚТЖ» ҰҚ» АҚ магистральдық желісінің Семей бөлімшесінің басшысы Айдын Шаукежанов 15 маусымға дейін өткелде жол төсемін жөндеу және ескерту сигналын жаңғырту жұмысының аяқталатынын айтты.

Жауапты мамандардың ақпаратына қаныққан әкім аталған учаскеде көлік жүргізушілері мен жаяу жүргіншілер үшін қолайлы жағдай жасауды ойластыруды тапсырды.

«Өткел үстімен көпір салу оңай шаруа емес. Оның құқықтық-экономикалық сұрақтарын айтпағанда, жобалық-сметалық құжаттамасын әзірлеудің өзіне біраз уақыт кетеді. Одан кейін ең негізгі құрылыс жұмыстары бар. Осыған байланысты қала әкіміне теміржол өтпесінің жобасын әзірлеу, жоба құнының алдын-ала есептеу жұмыстарымен айналысуды тапсырамын», -деді облыс басшысы.

Бұдан бөлек сол жағалаудағы айналма жолдағы кептелісті ретке келтіру, қауіпті жол қиылыстарында бағдаршамдар орнату мәселелері бойынша қала басшылығы мен әкімшілік полиция бөліміне нақты міндеттер жүктеді.

Облыс әкімі Иртышская көшесіндегі 17 үйдің ауласында жүргізілген абаттандыру жұмыстарын да қарады. Бұл жерде былтыр «Арнайы Құрылыс» ЖШС абаттандыру жүргізген. Қазіргі таңда мердігерлер кепілдік міндеттемелері бойынша олқылықтарды қалпына келтіріп жатыр.

Аймақ басшысы Қайым Мұхамедханов көшесіндегі 33 үйдің ауласында облыстық қоғамдық кеңестің мүшесі Николай Исаевпен және тұрғындармен кездесті. Кездесу барысында тұрғындар ауланы абаттандырып, үйді терможаңғырту бағдарламасына енгізу бойынша өтініштерін жеткізді. Облыстық қоғамдық кеңес мүшесі Найманбаев көшесіндегі 155 үйдің ауласы жайлы да өз сауалын жолдады. Соңғы мекен-жай бойынша абаттандыру жүргізу жоспарға енгізілген.

Сапар соңында әкім тұрғындар тарапынан көтерілген мәселелердің барлығын назардан тыс қалдырмай, сапалы жұмыс атқаруды тапсырды.