Елдің азық-түлік қауіпсіздігін қамтамасыз ету, мол өнім алудың негізгі өзегі – құнарлы топырақ. Сондықтан топырақ құнарлығын сақтау, оны жақсарту жұмыстары күн тәртібінен түспек емес.

Республика бойынша  ауыл шаруашылығы мақсатындағы ең маңызды жерлердің көлемі 115,9 млн.га немесе жалпы жер көлемінің 44,1%-ы.

Әйткенмен, жел және су эрозиясына ұшыраған ауыл шаруашылығы жерлерінің жалпы ауданы 30,5 миллион гектарды құрап отыр. Бұл туралы ауыл шаруашылығы министрлігі Жер ресурстарын басқару комитетіне қарасты Жерлерге зерттеп-қарау жұмыстарын жүргізу мемлекеттік институтының ресми мәлімдемесінде айтылған.

Ондағы дерек пен дәйекке терең талдау жасасақ, топырағы әбден тозған аумақтардың жалпы ауданы 26,6 миллион га.

Бұл туралы: – Соңғы жылдары жердің деградациясының күшеюі және су және жел эрозиясының өсу тенденциясы байқалып отыр. Бұл ретте топырақтың көпшілігінде қарашірік мөлшері 40-45%-ға дейін төмендеген. Жайылымдар деградациясының 95%-дан астамы ойпатты бөлікте көбірек байқалады. Жердің деградациясының және топырақ құнарлығының төмендеуінің негізгі себептері – климаттың өзгеруі, табиғи ортаға антропогендік әсердің күшеюінен болып отыр, – дейді аталмыш мекеме директоры Гүлжаһан Бимендина.

Бүгінде жердің сапасын бақылауға қатысты түйткілді мәселені терең зерделеу мақсатында, Жерлерге зерттеп-қарау жұмыстарын жүргізу мемлекеттік институты табанды еңбек етіп келеді. Аталмыш мекеме жерлерге мониторинг жасап, топырақ және геоботаникалық зерттеулер жүргізеді. Ал олардың негізінде цифрлық ауыл шаруашылығы карталары жасақталады.