Қорғаныс министрлігінің офицерлері, «Жас сарбаз» балалар-жасөспірімдер қозғалысының тәрбиеленушілері, ҚР Қарулы күштері Ұлттық әскери-патриоттық орталығының шығармашылық ұжымы жастарды әскердегі қызмет жағдайымен таныстыру мақсатымен Павлодар, Абай облыстарының елді мекендерінде болды.

Ақпараттық-түсіндіру тобының мүшелері аудан орталықтарында концерт  қойып, жоғары сынып оқушыларымен, колледждер мен жоғары оқу орындарының студенттерімен әңгімелесіп, сұрақ-жауап кештерін өткізді.

Орта мектеп түлектері «Әскери билеттен бөлек, армия жастарға не береді?» деген сұрақтар қойды.

Қорғаныс министрлігі Әскери білім және ғылым департаментінің офицері майор Рүстем Төлегенов мерзімді қызмет сарбаздары үшін еліміздің заңнамасында көзделген жеңілдіктер туралы айтып берді.

 – Қазақстанда екі жылдан бері әскери қызметтің белгіленген мерзімін өткерген сарбаздарға Қазақстанның кез келген жоғары оқу орнына ҰБТ тапсырмай түсуге мүмкіндік беретін «Срочники 2.0» бағдарламасы жұмыс істейді. Қорғаныс министрлігінің бұл бастамасы сынақтан сәтті өткен соң заңнамалық тұрғыда бекітілді. Бұдан бөлек, мерзімді әскери қызмет өткеру кезінде сарбаздарға «Кредиттік демалыс» деп аталатын төлемдерді 13 ай мерзімге пайыз есептемей кейінге қалдыру мүмкіндігі беріледі, – деді майор Рүстем Төлегенов. 

Сонымен қатар, әскери қызметшілер жасөспірімдерге елдің әскери жоғары оқу орындарына түсу ережелерін түсіндіріп, Отан қорғаушы мамандығы туралы айтып берді.

Ақпараттық-түсіндіру тобының бағдарламасына Ұлы Отан соғысының батырларына арналған жылжымалы мұражай экспозициясының қойылымы, Ұлттық әскери-патриоттық орталық шығармашылық ұжымының концерті, сондай-ақ жергілікті атқарушы органдардың өкілдерімен кездесулер кіреді. 

16 қыркүйекте жұмысын бастаған ақпараттық-түсіндіру тобының сапары 12 қазанға дейін жалғасады. Осы уақыт ішінде Қорғаныс министрлігінің әскери қызметшілері 20-ға жуық елді мекенге барып, 10 мыңнан астам жаспен кездесуді жоспарлап отыр.