Абай облысында 226 мыңнан астам бала білім алатын 561 білім беру мекемесі бар. Облыстық білім басқармасының мәліметіне сүйенсек, Семей қаласында биыл мектепке дейінгі білім беру сапасын арттыру және балаларды толық қамту мақсатында 2 жекеменшік балабақша ашылып, 183 жаңа орын пайдалануға берілген. Сонымен қатар қолданыстағы мектепке дейінгі мекемелердің сыйымдылығы 1466 орынға ұлғайтылды. 

Қазіргі күнде «Жайлы мектеп» ұлттық жобасы аясында төрт мектептің құрылысы қарқынды жүргіп жатыр. Семей қаласының сол жақ бөлігінен салынып жатқан көпфункционалды Оқушылар сарайының құрылысын биыл аяқтап, пайдалануға беру жоспарланған. Сонымен қатар Абай ауданында 40 орындық балаларға арналған жазғы лагерьдің құрылысы қолға алынған.

Спикердің айтуынша, білім беру мекемелерінің материалдық-техникалық базасын нығайту мақсатында 46 мектепке 48 жаңа пәндік кабинет сатып алынып, 320 интерактивті панель орнатылған. «Қазақстан халқына» қорының қолдауымен 4 тірек мектепте жалпы сомасы 1 млрд теңгеге жаңғырту жұмыстары жүргізілді. Сонымен қатар ауылдық 127 мектепте Starlink жүйесі қосылып, интернет жылдамдығы 4 Мбит/с-тен 100-200 Мбит/с-ке дейін артқан.