Standard & Poor's (S&P) халықаралық рейтингтік агенттігі Қазақстанның алты банкі мен ірі микроқаржы ұйымының рейтингтерін растады.

Тұтастай алғанда, S&P деректері бойынша, экономикалық циклдарда активтердің сапасын неғұрлым саралап басқару кезінде банк жүйесінің тұрақтылығы көрсеткіштерінің жақсарғаны байқалды. Кредиттер бойынша ықтимал шығындарға арналған резервтерді қалыптастыруға арналған шығыстар және Қазақстан банк секторының проблемалық кредиттерінің үлесі 2015-2020 жылдары байқалған деңгейден едәуір төмен болып қалуда және активтер сапасының көрсеткіштері тұрақты болып қалады деп күтілуде.

Қазақстанның банк секторының  елдік және салалық тәуекелдерінің бағасы (Banking Industry Country Risk Assessment, BICRA) да «9»-дан «8»-ге жақсартылды және өз қызметін негізінен Қазақстанда жүзеге асыратын банктер рейтингінің базалық деңгейі «b+»-тен «bb-»-ке дейін көтерілді.

Нәтижесінде мына ұйымдардың ұзақ мерзімді және қысқа мерзімді кредиттік рейтингтері расталды:

«Қазақстан Халық банкі» АҚ «BВ+/B» деңгейінде. Болжам — «Тұрақты»;

«Kaspi Bank» АҚ «ВВ/В» деңгейінде. Болжам — «Тұрақты»;

«Банк ЦентрКредит» АҚ «В+/В» деңгейінде. Болжам — «Тұрақты»;

«ForteBank» АҚ «ВВ-/В» деңгейінде. Болжам — «Тұрақты»;

«Нұрбанк» АҚ «В-/В» деңгейінде. Болжам — «Тұрақты»;

«Банк Фридом Финанс Қазақстан» АҚ «В/В» деңгейінде. Болжам — «Тұрақты»;

Сондай-ақ, «ОнлайнКазФинанс» микроқаржы ұйымы» ЖШС (бұдан әрі — ОКФ) «В-/В» деңгейінде. Болжам — «Тұрақты».

Рейтингтік агенттіктің бағалауы бойынша, Қазақстанның нақты ІЖӨ кейіннен экономиканың алдағы үш жыл ішінде жылына 4%-дан аз өсуімен 2023 жылы шамамен 4%-ға өседі деп күтілуде.

Хабарда Қазақстанның банк секторы кредиттік шығындар  өскеннен кейін түзетудің ұзаққа созылған кезеңінен кейін қалпына келу белгілерін көрсетіп отырғаны атап өтілді. Қалпына келтіруге кредитке сұранысты ынталандыратын шикізат тауарларына қолайлы баға,                     сондай-ақ активтер сапасының айтарлықтай жақсаруы ықпал етеді. Қазақстан банктерінің көрсеткіштеріне жоғары маржа мен пайда табу қабілеті оң әсер етеді, бұл сыртқы операциялық ортаның белгісіз және құбылмалы болып қалғанына қарамастан, оларды тәуекелдерден қорғауды қамтамасыз етеді.

2022 жылы Қазақстанның банк секторының таза пайдасы 1,5 трлн теңгені (3,2 млрд АҚШ доллары) құрады, бұл 2021 жылмен салыстырғанда 14%-ға жоғары. Ағымдағы жылы пайда көрсеткіштері бірдей деңгейде сақталады деп күтілуде, бұл ретте орташа капиталдың рентабельділігі (return on average equity, ROAE) 25-30%-ды құрайды, ал таза пайыздық маржа 5%-дан жоғары болады.

Бұл ретте, халықаралық бағалаулар бойынша кредиттеудің өсу қарқыны қалпына келуді жалғастырады және номиналды көрсетуде жылына шамамен 15-17%-ды құрайды, ал Қазақстанның банк секторының проблемалық кредиттерінің үлесі тұтастай алғанда 9%-ға жуық деңгейде тұрақты болып қалады.