Сенат Спикері Мәулен Әшімбаевтың төрағалығымен Палата отырысы өтті. Онда сенаторлар күн тәртібіне шығарылған заңдарды қарады және өздерінің депутаттық сауалдарын жолдады.

Отырыс барысында екі оқылымда қаралған «Қазақстан Республикасының кейбір заңнамалық актілеріне резервтегі әскери қызмет және жекелеген орталық мемлекеттік органдардың функцияларын қайта бөлу мәселелері бойынша өзгерістер мен толықтырулар енгізу туралы» заң Қарулы Күштерді, басқа да әскерлер мен әскери құралымдарды резервтік күштермен қамтамасыз ету үшін құқықтық негіз құруға бағытталған.

«Заң резервтегі әскери қызметті өткерудің құқықтық негіздері мен шарттарын қалыптастыруды көздейді. Осы мақсатпен «резервтегі әскери адамдардың» мәртебесі, олардың құқықтары мен міндеттері айқындалды. Әскери қызметін резервте өткеретін азаматтарды әлеуметтік қамсыздандыру мәселесі де реттеліп отыр. Мақұлданған заң Қарулы Күштеріміздің әлеуетін және еліміздің қорғаныс қабілетін арттыруға оң ықпалын тигізеді деп сенеміз», – деді Палата Төрағасы.

Заң арқылы азаматтардың резервтегі әскери қызмет өткеру мерзімі мен тәртібі, олардың құқықтары мен міндеттері және қойылатын талаптар мен шектеулер белгіленеді. Нақты айтқанда, арнаулы мемлекеттік және құқық қорғау органдарында қызмет өткеретін, вахталық әдіспен не ауысымдық жұмыста істейтін азаматтар резервтегі әскери қызметке қабылданбайды. Бұдан басқа, заңда әскери қызметшілерге 2016 жылғы 1 қаңтардан бастап тағайындалған еңбек сіңірген жылдары үшін зейнетақы төлемдерін жыл сайынғы индекстеу жөніндегі нормалар қарастырылған. Сондай-ақ жеткілікті еңбек сіңірген жылдары бар күштік құрылымдардың қызметкерлеріне келісімшарт мерзімі өткеннен кейін зейнетақы төлемдеріне құқық беріледі.

Сонымен қатар Палата отырысында сенаторлар «Қазақстан Республикасының Үкіметі мен Ресей Федерациясының Үкіметі арасындағы Қазақстан Республикасы мен Ресей Федерациясының біртұтас энергетикалық жүйелерінің қатар жұмыс істеуін қамтамасыз ету жөніндегі шаралар туралы келісімді ратификациялау туралы» заңды қарап, мақұлдады. Келісімді ратификациялау Қазақстан мен Ресейдің энергетикалық жүйелерінің қатар жұмыс істеуін қамтамасыз етуге, электр энергетикасы саласындағы өзара тиімді ынтымақтастықты одан әрі кеңейтуге және Қазақстанның энергетикалық жүйелеріндегі реттеуші қуаттардың тапшылығын азайтуға мүмкіндік береді.

Сондай-ақ Сенат депутаттары «Біріккен Ұлттар Ұйымының бөлуді бақылау жөніндегі күштеріне (UNDOF) ресурс ұсынатын Қазақстан Республикасының Үкіметі мен Біріккен Ұлттар Ұйымы арасындағы өзара түсіністік туралы меморандумды ратификациялау туралы» және «2024 жылғы 14 ақпандағы Біріккен Ұлттар Ұйымының бөлуді бақылау жөніндегі күштеріне (UNDOF) ресурс ұсынатын Қазақстан Республикасының Үкіметі мен Біріккен Ұлттар Ұйымы арасындағы өзара түсіністік туралы меморандумға хаттар алмасу нысанындағы келісімді ратификациялау туралы» заңдарды қарап, мақұлдады.

Талқылау кезінде атап өтілгендей, бұл Келісімдерді ратификациялау Қазақстанға БҰҰ-ның тұрақты әрі сенімді серіктесі ретінде халықаралық бітімгершілік миссиясына қосылуға және оған өз үлесін қосуға жол ашады. Меморандумдар Қазақстан Республикасының бітімгершілік қызметінің құқықтық және ұйымдастырушылық негіздерін белгілейді, персоналды, техниканы және материалдық қамтамасыз етуді беру тәртібін, сондай-ақ, қаржыландыру және шығындарды өтеу тетігін айқындайды. Құжаттар UNDOF құрамындағы қазақстандық әскери қызметшілердің мәртебесін, олардың тәртіптік және қылмыстық жауапкершілігі мен міндеттемелердің орындалуын бақылау шараларын бекітеді. Меморандум аясында БҰҰ Қазақстан Республикасының миссияға қатысуына байланысты шығыстарды өтеуге міндеттеме алады.

Отырыс кезінде сенаторлар өзекті мәселелерге қатысты депутаттық сауалдарын да жолдады.

Андрей Лукин көктемгі су тасқыны маусымының жақындағанына назар аударып, елдегі гидротехникалық нысандардың апатты жағдайына алаңдаушылық білдірді. Осыған байланысты депутат жағдайды жақсартуға арналған шараларды ұсынды.

Дархан Қыдырәлі халықаралық стандарттармен салыстырғанда отандық әскери білім беру жүйесі ескіргенін айтып, аталған бағыттағы өзекті проблемаларды көтерді. Сенатор бұл саланы жетілдіріп, заманауи технологиялар бойынша мамандар даярлау үшін қысқа мерзімді әскери курстар ашу қажет екенін атап өтті.

Руслан Рүстемов Қызылорда облысындағы экологиялық ахуалы қолайсыз аудандарды ауыз сумен қамтамасыз етуге қатысты түйткілдерге тоқталды. Мәселелерді тиімді шешу үшін ол Үкіметті қосымша қаржы бөлуге, оның ішінде ауылдарды топтық су құбыры желісіне қосуға және басқа да маңызды жобаларды жүзеге асыруға шақырды.