Абай облысының әкімі Берік Уәли аудандағы жұмыс сапары барысында Екпін және Ойшілік ауылдарындағы мектептердің жәй-күйімен танысты.

Ауданда 19 мектеп бар. Екпін ауылындағы Ысқақ Кабеков атындағы білім ордасы 1991 жылы салынған. Қазіргі таңда 330 оқушы білім алуда. Мектептің спорт залы күрделі жөндеуді қажет етеді. 2021 жылы апатты деп танылып, содан бері жабық тұр. Мектептің кейбір бөлігінің сыртқы қабырғалары жарыла бастаған.

Қазіргі уақытта ауылға жаңа мектеп салу үшін жеке кәсіпкерлер есебінен жобалық-сметалық құжаттама әзірленуде.

Мектеп директоры облыс әкіміне ауылда жаңа мектеп салуға көмек көрсетуді сұрады. Аймақ басшысы өңірде апатты жағдайда тұрған бірнеше мектеп бар екенін атап өтіп, бұл білім ордаларына бірінші кезекте көңіл бөлінетінін айтты.

Аймақ басшысы Ойшілік ауылындағы Тоғас батыр орта мектебінде де болды. 1970 жылы салынған ғимаратта 326 бала оқиды. 78 мұғалім еңбек етеді. Білім ордасына 2022 жылы күрделі жөндеу жүргізілген.

Облыс әкімі мектептің кабинеттерін, кітапхананы аралап, мұғалімдермен, оқушылармен пікірлесті.

Аймақ басшысы ауылдың тыныс-тіршілігімен танысып, ақсақалдармен, ардагерлер кеңесінің мүшелерімен, ардагер ұстаздармен, елді мекеннің белсенді азаматтарымен кездесіп, өзекті мәселелерін тыңдады.

Тұрғындар облыс әкіміне елді мекеннің оқушыларының спортта үздік екенін, мектептің спорт залының тарлық етіп жүргенін жеткізіп, ауылға дене шынықтыру кешені қажеттігін айтты.

Аймақ басшысы тұрғындардың өтінішін өз бақылауына алып, қолдау көрсететінін айтты.