Бородулиха – Абай облысының негізінен егістік алқаптарын игеру ісі оңтайлы жолға қойылған ауданы. Мұндағы шаруашылық иелерінің жер игерудегі тәжірибесі де мол. Сондай-ақ дәнді және дәнді-бұршақты дақылдар 161,7 мың гектарға, оның ішінде майлы дақылдар 149,6 мың гектар жерге егілуі соның айғағы. Ауданның жалпы жер аумағы 698 мың га, оның ішінде ауыл шаруашылығы мақсатындағы жерлер 475,5 мың га (оның егістік үлесіндегісі – 356,4 мың га, жайылымдығы – 105,8 мың га, шабындық жері – 8,2 га).

Ауданда бұдан өзге өнеркәсіпті өркендету, инвестиция тарту, шағын және орта бизнесті дамыту, жолдарды күрделі жөндеуден өткізу секілді маңызды салаларға да назар аударылып отыр. Бұл туралы Бородулиха ауданының әкімі Айдар Ибраев Абай өңірлік коммуникациялар орталығында өткен баспасөз мәслихатында мәлімдеді.

Өткен жылы «Ауыл – ел бесігі» жобасы аясында атқарылған жұмыстар жайын айтар болсақ, аталған жоба аясында 384 млн теңгеге 11 жоба жүзеге асырылған. Сол тұрғыда Камышенка, Жерновка, Новая Шульба, Дмитриевка ауылдарында 4 футбол алаңы салынған. Одан өзге Жерновка ауылында - 1 хоккей корты, Ивановка ауылында  1 воркаут алаңы ел игілігіне пайдалануға берілген. 2 жоба бойынша жолдарды орташа жөндеу жұмыстары орындалған. Оның бірі Новая Шульба ауылында 6,65 км жолды жөндеуге 161,7 млн теңге, Камышенка ауылында 1,5 км жолды жөндеуге 29,8 млн теңге жұмсалған.

Сондай-ақ аудан әкімінің баяндамасында көрсетілгеніндей Белағаш, Зенковка, Камышенка ауылдарында 3 жоба аясында 403 көше шамын орнату жүзеге асқан.