Соңғы уақытта «Abay Media Group» ЖШС қарасты ақпараттық-аналитика бөлімінің мамандары дайындайтын Абай облысының қала және аудан әкімдерінің рейтингі қызу талқыға түскені анық. Бұл рейтинг тұрғындарға әкімдердің өз міндеттерін қаншалықты орындайтынын көруге, сондай-ақ олардың жұмысының күшті және әлсіз жақтарын анықтауға мүмкіндік беріп келеді. 

Әкімдер арасында көшбасшылар мен аутсайдерлер анықталды.

Алғашқы үштік рейтинг көшбасшылары: 

1) Талғат Батырұлы Мұратов

2) Әділет Нұрсағатұлы Қожанбаев 

3) Дәурен Бақытжанұлы Қойгельдин

Орташа рейтинг:

4) Нұрбек Тұрсынқанұлы Қошқарбаев

5) Ақылбек Жұмабекұлы Башимбаев

6) Мейіржан Серікбосынұлы Смағұлов

7) Нұрлан Мұхаметрақымұлы Борсықбаев

8) Айдар Маратұлы Ибраев

9) Ерсін Кәдірбекұлы Ескендіров

Аутсайдерлер: 

10) Алмас Таныбекұлы Тастенбеков

11) Данияр Қайырханұлы Шәкәрімов

12) Болат Таңсықбайұлы Әбдірәлиев

1. Мұратов Талғат Батырұлы – Семей қаласының әкімі.

2025 жылдың наурыз айында Семей қаласының әкімі Талғат Батырұлы Мұратов әлеуметтік желілердегі белсенділігі бойынша 5037,2 ұпай жинап, өңірдегі әкімдер арасында бірінші орынды иеленді. Бұл — әкімнің ашықтық пен халықпен кері байланыстың маңызын жақсы түсінетінін, ел алдында атқарылған жұмыстарды уақытылы және шынайы жеткізе білгенін көрсетеді.

Наурыз айында Талғат Мұратов тұрғындарды үш рет жеке қабылдап, әр азаматтың мәселесіне жіті көңіл бөлді. Қар тазалау жұмыстары күшейтіліп, көктемгі су тасқынының алдын алу шаралары жүйелі түрде жүргізілді. Қала инфрақұрылымын жақсарту және халықтың қауіпсіздігін қамтамасыз ету бағытында нақты жұмыстар қолға алынды.

Семей қаласы мәслихатының кезекті сессиясында бес бірдей инвестициялық жобаның жүзеге асырылатыны мәлім болды. Бұл жобалар нәтижесінде 800-ге жуық жаңа жұмыс орны ашылады. Мұндай бастамалар — өңірдің экономикалық әлеуетін арттырып, тұрғындардың әл-ауқатын жақсартуға септігін тигізетіні анық.

Сонымен қатар, Семей қаласында Наурыз мерекесіне орай ұйымдастырылған қоғамдық іс-шаралар, мәдени-көпшілік бағдарламалар кең көлемде өтті. Әкімнің өзі Семей футзал клубының тарихи жеңісін жоғары бағалап, спортшыларды салтанатты түрде қарсы алды. Бұл — қала басшысының спорт пен жастарды қолдауға деген ерекше ықыласының көрінісі.

Барлық осы жұмыстар мен бастамалар әлеуметтік желіде де кеңінен талқыланып, көпшілік тарапынан оң пікірлерге ие болды. Қаралым санының артуы, тұрғындардың белсенді қатысуы мен жылы лебіздері әкімнің халықпен етене байланыс орнатудағы еңбегін дәлелдейді.

Жалпы алғанда, Талғат Батырұлының наурыз айындағы қызметі Семей қаласының дамуына серпін беріп, халық сенімін нығайта түсті.

Әлеуметтік желілерді жүргізу туралы ұсыныс: желідегі белсенділікті одан әрі қарай арттыру ұсынылады.

2. Қожанбаев Әділет Нұрсағатұлы - Көкпекті ауданының әкімі.

2025 жылдың наурыз айындағы әлеуметтік желідегі белсенділік рейтингі бойынша Көкпекті ауданының әкімі Қожанбаев Әділет Нұрсағатұлы 2108,1 ұпай жинап, екінші орынға тұрақтады. Ақпан айының үздігі атанған әкім бұл жолы да ауданның дамуы мен тұрғындармен тиімді байланыс орнату бағытындағы қарқынды жұмысын жалғастырды.

Әділет Нұрсағатұлы өз парақшасында жастарға деген ерекше қолдауын, оларды ауданның мақтанышы ретінде бағалайтынын ашық білдірді. Әкім аудан намысын қорғап, түрлі байқауларда жеңіске жеткен жастармен кездесіп, оларды арнайы қабылдап, марапаттады. Бұл – жас буынды шабыттандырып, болашаққа сенім ұялататын маңызды қадам.

Наурыз айында ауданға жұмыс сапарымен келген Абай облысының әкімі Берік Уәлиге ауданның маңызды нысандары көрсетілді. Атап айтқанда, кіреберістегі көпір мен аудан орталығындағы автобекетті жаңғырту жұмыстары, Көкпекті орта мектебі мен аудандық аурухананың жай-күйі, сондай-ақ оқушылар шығармашылық сарайының жұмысы таныстырылды. Бұл сапар ауданның инфрақұрылымын жаңарту мен әлеуметтік нысандардың жағдайын жақсартуға бағытталған кешенді жұмыстардың жүргізіліп жатқанын көрсетті.

Сонымен қатар, көктемгі Наурыз мерекесі аудан көлемінде кең көлемде аталып өтті. Мәдени-көпшілік іс-шаралар, ұлттық салт-дәстүрді дәріптеген думанды мерекелер елдің бірлігі мен рухын көтерді.

Аудан аумағындағы қар тазалау жұмыстары да әкімнің тұрақты бақылауында болды. Тұрғындарды жеке мәселелерімен қабылдап, нақты шешімдер қабылдауға уақыт тапқан әкімнің бұл ісі де әлеуметтік желі қолданушылары тарапынан оң бағасын алды.

Жалпы, Әділет Қожанбаевтың халықпен етене байланысы, жастарды қолдауы мен ауданның әлеуметтік мәселелеріне жіті назар аударуы оның жұмысындағы жүйелілік пен жауапкершілікті айқын көрсетеді.

Әлеуметтік желілерді жүргізу туралы ұсыныс:  желідегі белсенділікті одан әрі қарай арттыру ұсынылады.

3. Қойгельдин Дәурен Бақытжанұлы – Мақаншы ауданының әкімі.

2025 жылдың наурыз айындағы әлеуметтік желідегі белсенділік рейтингі бойынша үздік үштікті Мақаншы ауданының әкімі Дәурен Бақытжанұлы Қойгельдин 2100,9 ұпаймен қорытындылады. Бұл – аудан әкімінің аймақ дамуына қатысты атқарған жүйелі жұмысы мен тұрғындармен байланыс орнатудағы жаңа қадамдарының нәтижесі.

Наурыз айындағы жұмыс Семей педагогикалық колледжінің директоры, облыстық мәслихат депутаты Шағангүл Алдамжарқызы Жанаеваның Мақаншы ауданына сапарымен басталды. Кездесу барысында мәдениет пен білім салаларын дамытуға қатысты бірқатар маңызды мәселелер көтеріліп, өзара ынтымақтастықтың жаңа бағыттары талқыланды. Бұл – өңірдің рухани әрі зияткерлік әлеуетін арттыруға жасалған нақты қадам.

Сондай-ақ аудан әкімі облыстық терроризмге қарсы күрес жұмыс тобымен кездесу өткізіп, қоғам қауіпсіздігіне қатысты өзекті мәселелерді ортаға салды. Халықаралық әйелдер күніне орай Дәурен Қойгельдин ардақты аналарға арнайы құрмет көрсетіп, мерекелік көңіл күй сыйлады.

Әкімнің Бақты, Ақшоқы, Қарабұта ауылдарына жасаған жұмыс сапарлары да айрықша маңызға ие болды. Абай облысының әкімі Берік Уәлидің ауданға жасаған сапары аясында аталған ауылдардағы мектептер мен әлеуметтік маңызы бар нысандар көрсетіліп, Алакөл көлінің туристік әлеуетін дамыту туралы нақты тапсырмалар берілді. Бұл – өңірдің болашақта ірі туристік орталыққа айналуына жол ашатын маңызды бастама.

Аудан тұрғындары үшін жағымды жаңалықтардың бірі — әкімнің Facebook әлеуметтік желісінде жеке парақша ашуы. Бұл – ашық әкімдік қағидатын ұстанудың, халықпен тікелей диалог орнатуға бет бұрғанының белгісі. Егер алдағы уақытта парақша белсенді жүргізіліп, тұрғындардың ұсыныс-тілектері ескеріліп отырса, бұл әкімдік жұмысының тиімділігін арттыра түсері сөзсіз.

Дәурен Бақытжанұлының наурыз айындағы қызметі – тың бастамалар мен қоғамдық белсенділікке толы кезең болды. Оның халықпен етене байланыс орнатуға деген ұмтылысы мен ашықтыққа бет бұрғаны тұрғындар тарапынан қолдауға ие болуда.

Әлеуметтік желілерді жүргізу туралы ұсыныс: желідегі белсенділікті одан әрі қарай арттыру ұсынылады

4. Қошқарбаев Нұрбек Тұрсынқанұлы – Бесқарағай ауданының әкімі.

2025 жылдың наурыз айындағы әлеуметтік желідегі белсенділік рейтингісінде 2030,3 ұпаймен орташа рейтинг көшін бастаған Бесқарағай ауданының әкімі Нұрбек Тұрсынқанұлы Қошқарбаевтың жұмысына қатысты кейбір кемшіліктерді атап өткен жөн.

Әкім наурыз айында Абай облысының өңірлік коммуникациялар қызметінде ауданның әлеуметтік-экономикалық дамуы, өзекті мәселелері мен алдағы жоспарлары жөнінде мәлімдеме жасады. Бұл – маңызды әрі қажетті шара. Дегенмен, осы секілді ақпараттарды тек ресми жиындарда ғана емес, әлеуметтік желілер арқылы да халыққа ұдайы әрі ашық жеткізіп отыру қажет.

Әкімнің жеке қабылдауларында қозғалған мәселелер мен оларды шешу жолдарын жазбаша түрде тізіп көрсетуі – жауапкершілік пен есеп берудің жақсы үлгісі. Алайда бұл жұмыстарды тұрғындармен кері байланыс орнатудың пәрменді құралы болып отырған әлеуметтік желіде де жиі жариялап отыру керек. Қабылданған шешімдер мен нақты атқарылған істер туралы жүйелі түрде бөлісіп отырмау — ашықтықтың жетіспеуін көрсетеді.

Яғни, әкім ақпаратты тек баспасөз арқылы емес, әлеуметтік желіде де белсенді бөлісіп отырса, халықтың сенімі артып, аудан әкімдігінің жұмысы бұқараға әлдеқайда түсінікті әрі жақын болар еді. Қазіргі заманда әкімдердің онлайн кеңістіктегі ашықтығы – елмен диалогтың, сенімді қарым-қатынастың маңызды көрсеткіші екенін ескерген абзал.

Әлеуметтік желілерді жүргізу туралы ұсыныс: желідегі белсенділікті одан әрі қарай арттыру ұсынылады.

5. Башимбаев Ақылбек Жұмабекұлы – Үржар ауданының әкімі.

2025 жылдың наурыз айында 1872,1 ұпай жинап, бесінші орынға жайғасқан Үржар ауданының әкімі Ақылбек Жұмабекұлы Башимбаев өз жұмысында тыңғылықтылық пен ашықтықты көрсете білді. Әкім ақпан айында айтылған ескертулер мен ұсыныстарды назардан тыс қалдырмай, оларды ескеріп, нақты іс-шаралар қабылдаған. Бұл – басшының тұрғындар пікіріне құлақ асатын, қоғаммен ашық диалог орнатуға дайын екенін көрсетеді.

Су тасқынының алдын алу бағытында жүргізілген белсенді жұмыстар мен Абай облысының әкімі Берік Уәлидің төрағалығымен өткен төтенше жағдайлардың алдын алу жөніндегі комиссия отырысына белсене қатысуы – аудан қауіпсіздігіне деген жауапкершіліктің айғағы. Сонымен қатар, ауданның әлеуметтік-экономикалық дамуы туралы мәселелерді көтеріп, оны шешуге өз үлесін қосуы – стратегиялық көзқарастың белгісі.

Облыс әкімінің Үржар ауданына жұмыс сапары барысында Қазымбет ауылындағы мектеп, май зауытының құрылысы, тарихи-өлкетану мұражайының жұмысы және Үржар әуежайын жаңарту жобасы сынды маңызды нысандарды аралап көруі – аудандағы ауқымды өзгерістердің бастамасы екенін аңғартады.

Сонымен қатар, әкімдік қызметінің ашықтығы мен халыққа қолжетімді болуын қамтамасыз ету мақсатында жарияланатын фото-визуал материалдарға назар аударыла бастауы – оң үрдіс. Кездесулер мен іс-шаралар тек ресми фотосуреттермен ғана емес, мазмұны терең, тартымды әрі сапалы визуалмен сүйемелденсе, бұл тұрғындармен сенімді қарым-қатынас орнатуға үлкен сеп болары анық.

Ақылбек Жұмабекұлының тұрғындармен тиімді байланыс орнатуға, ақпараттың сапасын арттыруға, сондай-ақ ауданның даму барысын ашық көрсетуге бағытталған бұл қадамдары – әкімдік жұмысының жаңа деңгейге көтерілгенін көрсетеді.

Әлеуметтік желілерді жүргізу бойынша ұсыныс: желідегі белсенділікті одан әрі арттыру және ақпаратты толық түсінікті жеткізу ұсынылады.

6. Смағұлов Мейіржан Серікбосынұлы – Абай ауданының әкімі.

2025 жылдың наурыз айында 1859,5 ұпай жинап, алтыншы орынға жайғасқан Абай ауданының әкімі Мейіржан Серікбосынұлы Смағұловтың әлеуметтік желідегі белсенділігі мен ақпараттық ашықтығы орташа деңгейде бағаланады. Әкімдік сайтында да, жеке парақшасында да бірқалыпты ақпараттар жарияланып отырғанымен, олар жеткіліксіз және жүйелі сипатта емес.

Наурыз айында әкім Абай облысының өңірлік коммуникациялар қызметі алаңында өткен баспасөз мәслихатына қатысып, БАҚ өкілдерімен байланыс орнатуға талпыныс жасаған. Сонымен қатар көктемгі су тасқынына дайындық мақсатында тактикалық оқу-жаттығулар ұйымдастырылып, облыстық сейсмо жаттығулар өткізілгені атап өтуге тұрарлық.

Мерекелік шаралар да назардан тыс қалмаған. Халықаралық әйелдер күніне орай нәзікжандыларға құрмет көрсетіліп, Наурыз мерекесі кең көлемде аталып өтті. Әкім аудан спортшыларының жетістіктерін атап өтіп, олармен мақтанатынын әлеуметтік желіде көрсеткен.

Дегенмен, әкімнің парақшасында нақты атқарылған шаралар мен қабылданған шешімдер туралы мәліметтер өте аз. Аудан өміріне әсер ететін нақты жұмыстар мен әкімдік тарапынан қабылданған қаулылардың жарияланбауы – ашықтық деңгейінің төмендігін көрсетеді. Наурыз айындағы ақпараттардың басым бөлігі мерекелік сипатта болғандықтан, ай бойғы жұмыс тек той-думанмен шектелгендей әсер қалдырады.

Тұрғындармен тиімді кері байланыс орнату үшін ақпарат ағынын жүйелеу, нақты нәтижелер мен әкімдік шешімдерін дер кезінде жариялап отыру қажет. Бұл тұрғындардың сенімін арттырып, әкімдік жұмысының тиімділігін көрсетуге мүмкіндік береді.

Әлеуметтік желілерді жүргізу бойынша ұсыныс: желідегі белсенділікті одан әрі арттыру және ақпаратты толық түсінікті жеткізу ұсынылады.

7. Борсукбаев Нұрлан Мұхаметрақымұлы– Жарма ауданының  әкімі.

2025 жылдың наурыз айында 1746,2 ұпай жинаған Жарма ауданының әкімі Нұрлан Мұхаметрақымұлы Борсықбаев рейтингте кезекті орынға жайғасты. Дегенмен, әкімдік жұмысының ақпараттық ашықтығы мен әлеуметтік желідегі белсенділігі төмен деңгейде қалып отыр.

Аудан әкімі қоғамдық кеңестің жаңа құрамымен кездесіп, кеңес отырысына қатысқаны – дұрыс бастама. Сондай-ақ Абай облысының әкімі Берік Уәлидің Жарма ауданына жұмыс сапары кезінде Шуақ кентіндегі қазандық, әлеуметтік нысандар мен Бақыршық тау-кен кәсіпорнына барғаны туралы ақпарат берілді. Бұл сапарлар аудан үшін маңызды нысандардың дамуымен танысуға мүмкіндік берді.

Алайда осы шаралар мен кездесулерден кейінгі нақты атқарылған жұмыстар, қабылданған шешімдер немесе алдағы жоспарлар туралы ашық әрі мазмұнды ақпарат берілмеген. Әкімдік отырыстары өткізіліп жатқаны айтылғанымен, оның мазмұны мен тұрғындар үшін қаншалықты пайдалы болғаны жайлы мәлімет жоқ. Бұл – ашықтық пен есептілік қағидаттарының сақталмауына әкеледі.

Жарма ауданы әкімдігіне ақпарат ағынын жүйелеу, тұрғындармен кері байланысты күшейту және қабылданған шешімдер туралы деректерді дер кезінде, толық әрі түсінікті түрде жариялап отыру қажет. Әйтпесе, әкімдік жұмысы сырт көзге формалды деңгейде ғана көрініп, нақты нәтиже байқалмай қалады.

Әлеуметтік желілерді жүргізу бойынша ұсыныс: желідегі белсенділікті одан әрі арттыру және ақпаратты толық түсінікті жеткізу ұсынылады.

8. Ибраев Айдар Маратұлы – Бородулиха ауданының әкімі.

2025 жылдың наурыз айындағы әлеуметтік желідегі белсенділік рейтингі бойынша 1579,8 ұпай жинаған Бородулиха ауданының әкімі Айдар Маратұлы Ибраев сегізінші орынға тұрақтады. Әкімнің жұмысында тұрғындармен байланыс орнату мен әлеуметтік мәселелерге назар аудару сынды оң бағыттар байқалғанымен, ақпараттық ашықтық пен жүйелілік тұрғысынан әлі де жетілдіруді қажет ететін тұстар бар.

Айдар Маратұлы тұрғындарды жеке қабылдап, мәдениет, кәсіпкерлік және тұрғын үй мәселелерін талқылағаны – әкімдік жұмысының халықпен тығыз байланыста екенінің белгісі. Сонымен қатар ерекше қажеттілігі бар балалардың ата-аналары көтерген көлік мәселесіне назар аударуы — әлеуметтік бағыттағы жұмыстың маңызды көрінісі.

Алайда бұл бастамалар әлеуметтік желілерде толыққанды әрі жүйелі түрде көрініс таппай отыр. Көтерілген мәселелер мен олардың нақты шешімі, қабылданған шешімдердің орындалу барысы туралы ақпараттар шектеулі. Бұл тұрғындар арасында әкімдік жұмысына деген сенімді арттыруға кедергі келтіруі мүмкін.

Абай облысының әкімі Берік Уәлимен бірге Петропавловка, Бородулиха, Жезкент және өзге елді мекендердегі нысандарды аралау — аймақтың инфрақұрылымын дамытуға бағытталған нақты қадам. Дегенмен, мұндай сапарлардан кейінгі нәтижелер мен жоспарлар туралы кеңірек әрі ашық ақпарат тарату – қоғам үшін аса маңызды.

Жалпы, Айдар Маратұлының халықпен жұмыс істеуге ниеті бар екені аңғарылады. Ендігі кезекте бұл жұмыстарды жүйелі түрде көрсетіп, тұрғындармен ашық ақпарат алмасу арнасын күшейту қажет. Бұл — әкімдік жұмысының тиімділігін арттырып, рейтингтегі орнын жақсартуға да ықпал етері сөзсіз.

Әлеуметтік желілерді жүргізу бойынша ұсыныс: желідегі белсенділікті одан әрі арттыру ұсынылады.

9. Ескендіров Ерсін Кәдірбекұлы – Ақсуат ауданының әкімі.

2025 жылдың наурыз айында 1491,3 ұпай жинаған Ақсуат ауданының әкімі Ерсін Кәдірбекұлы Ескендіров әлеуметтік желідегі белсенділік рейтингінде тоғызыншы орынға жайғасты. Аудан көлемінде атқарылған танымдық әрі әлеуметтік бағыттағы жұмыстар назар аударарлық, дегенмен ақпаратты ұсыну мен нәтижелерді нақты көрсету жағы әлі де жетілдіруді қажет етеді.

Наурыз айында аудан үшін маңызды оқиға – «Қазақ аналары – дәстүрге жол» қоғамдық ұйымының филиалының ашылуы болды. Бұл – ұлттық тәрбие мен рухани құндылықтарды дәріптеуге бағытталған игі бастама.

Сондай-ақ аудан әкімі Ойшілік және Құмкөл ауылдарына апаратын жолдағы Тебіске өзені үстіндегі көпірді қайта жаңғырту жұмыстарының барысымен танысты. Бұл – ауыл инфрақұрылымын жақсарту бағытындағы нақты қадамдардың бірі.

Ұлттық мұра жобасы аясында ұйымдастырылған Көкжыра ауылындағы тарихи-өлкетану мұражайына мектеп оқушылары мен ауыл ақсақалдарының сапары – жас ұрпаққа тарихи таным берудің жарқын үлгісі. Сонымен қатар, аудандық мұражай қызметкерлерінің көшпелі көрме ұйымдастырып, халықтың алғысына бөленуі де мәдени бағыттағы жұмыстың жақсы нәтижесі болды.

Алайда, осы атқарылған істердің шешімі мен нақты нәтижесі, одан шыққан пайда, тұрғындар тарапынан кері байланыс туралы ақпараттар өте аз. Егер әкімдік осы бағыттағы жұмысын ақпараттық тұрғыда күшейтіп, нәтижелерді жүйелі түрде көрсетсе – бұл халықпен байланыс пен сенімді нығайта түсер еді.

Ерсін Кәдірбекұлының бастаған танымдық және инфрақұрылымдық істері құптарлық. Енді сол жұмыстарды халыққа ашық, толық әрі түсінікті етіп жеткізу – келесі маңызды қадам болмақ.

Әлеуметтік желілерді жүргізу бойынша ұсыныс: желідегі белсенділікті одан әрі арттыру ұсынылады.

Аутсайдерлер

10. Тастенбеков Алмас Таныбекұлы – Жаңасемей ауданының әкімі.

2025 жылдың наурыз айындағы әлеуметтік желі белсенділігі рейтингінде 1361,7 ұпаймен аутсайдерлер қатарында қалған әкім – Алмас Таныбекұлы Тастенбеков. Жас ауданның жас әкімі ретінде бірқатар нақты істер атқарғанымен, ақпараттық ашықтық пен әлеуметтік желідегі белсенділік тұрғысынан әлеует толық пайдаланылмай отыр.

Айта кету керек, Шүлбі кентін қардан тазарту жұмыстары уақтылы әрі сапалы жүргізілген. Артынша облыс әкімі Берік Уәли келіп, әлеуметтік нысандардың жай-күйімен, орта мектептің жағдайымен және салынып жатқан көпқабатты тұрғын үй құрылысымен танысты. Бұл – ауданның инфрақұрылымдық дамуына бағытталған жұмыстардың бір бөлігі.

Алмас Таныбекұлы жастармен бір толқында болуға, заман талабына сай трендтерді қолдауға ниетті екенін көрсетіп жүр. Бұл – жас әкімге тән сергектік пен икемділіктің белгісі.

Алайда Facebook желісіндегі парақшалардың белсенділігі төмен. Әкімдік тарапынан атқарылып жатқан жұмыстар, қабылданған шешімдер мен олардың нақты нәтижелері туралы жүйелі әрі мазмұнды ақпараттар жетіспейді. Бұл – тұрғындармен кері байланыс орнатуға, сенімді арттыруға кері әсерін тигізуі мүмкін.

Жалпы, аудан әкімінің әлеуеті бар, бастамалары көңілге қонымды. Ендігі кезекте осы жұмыстарды ашық көрсетіп, әлеуметтік желілерді тиімді пайдалануға күш салу қажет. Бұл – жас әкімнің рейтингін де, халықпен байланысын да жаңа деңгейге көтеретіні анық.

Әлеуметтік желілерді жүргізу туралы ұсыныс: Facebook желісіндегі белсенділікті одан әрі қарай арттыру ұсынылады.

11. Шәкәрімов Данияр Қайырханұлы – Аягөз ауданының әкімі.

2025 жылдың наурыз айында 1013,3 ұпаймен рейтингтің соңғы сатысына жақын орналасқан Аягөз ауданының әкімі Данияр Қайырханұлы Шәкәрімовтің жұмысы бірқатар белсенді іс-шараларға толы болғанымен, ақпараттық ашықтық пен әлеуметтік желідегі белсенділік жағынан айтарлықтай әлсіздік байқалады.

Әкімдік тарапынан аудан көлемінде кездесулер өткізілген, қар тазалау жұмыстары жүргізілген, тіпті қытайлық инвесторлармен кездесу өтіп, нақты тапсырмалар да берілген. Бұл — әкімнің жұмыс кестесінің тығыз әрі белсенді екенін көрсетеді.

Алайда бұл іс-шаралардың нәтижесі мен қабылданған шешімдер туралы ешқандай нақты ақпарат жоқ. Халыққа арналған есеп, тұрғындарды қызықтыратын нақты деректер мен тиімділіктің көрсеткіштері мүлде жарияланбаған.

Facebook желісіндегі парақшада небәрі екі ғана пост жарық көрген, оның өзінде нақты дерек, талдау немесе қабылданған шешімдер туралы мәлімет атымен жоқ. Бұл – әкімдік жұмысының жариялылығына кері әсер етеді әрі халықпен байланыс жасауға мүмкіндік беретін маңызды алаңды пайдаланбай отырғанын көрсетеді.

Қызу жұмыс жүргізілгенімен, оның нәтижесін жұртқа жеткізбей, жай ғана шолумен шектелу – ақпараттық тұрғыда үлкен кемшілік. Аягөз сияқты ірі ауданда атқарылған істердің толық, ашық, жүйелі түрде көрсетілмеуі – әкімдік имиджіне де, халықтың сеніміне де әсер ететіні сөзсіз. Ендігі кезекте негізгі назарды нәтиже мен кері байланысқа аудару қажет.

Әлеуметтік желілерді жүргізу туралы ұсыныс: Facebook желісіндегі белсенділікті одан әрі қарай арттыру ұсынылады.

12. Әбдіралиев Болат Таңсықбайұлы – Курчатов қаласының әкімі.

2025 жылдың наурыз айында да, ақпандағы жағдай қайталанып, рейтингті қатарынан екінші ай қорытындылап тұрған – Курчатов қаласының әкімі Болат Таңсықбайұлы Әбдірәлиев. Бұл әкімдіктің ақпараттық ашықтық пен әлеуметтік желідегі жұмыс форматына жеткілікті көңіл бөлмей отырғанын көрсетеді.

Ақпан айында жасалған нақты ескертулердің ескерілмегені – жұмыс жүйесінің түзелмегенін аңғартады. Әсіресе, ақпаратты тарату тәсіліне қатысты кемшіліктер айқын. Бір сурет пен бейнематериалды қазақ тілінде жүктеп, артынша сол материалды орыс тілінде тағы бір рет жариялау арқылы тек жарияланым санын көбейтуге ұмтылғандай әсер қалдырады. Бұл тәсіл – шынайы ақпараттық мазмұнды байытып, тұрғындарға пайдалы дерек ұсынуға емес, формалды статистикалық белсенділікті арттыруға бағытталғандай.

Иә, қалада кездесулер өткен, облыс әкімімен бірге әлеуметтік маңызы бар нысандар араланған. Дегенмен, осы шаралардан кейін жасалған жұмыстар туралы толыққанды ақпарат жоқ. Атқарылған істердің нәтижесі, қабылданған шешімдер, тұрғындармен кері байланыс – мұның бәрі жеткіліксіз деңгейде ұсынылған.

Мұндай жағдай әкімдік жұмысының шынайы бейнесін ашуға кедергі келтіріп қана қоймай, тұрғындардың сенімін де төмендетеді. Қазіргі заманда әкімдердің жұмысы тек кабинеттегі жиналыстармен емес, оны қоғамға қалай жеткізіп, қаншалықты ашық жұмыс істейтінімен де бағаланады. Бұл тұрғыда Курчатов қаласы әкімдігіне ақпарат тарату форматын түбегейлі қайта қарап, сапа мен мазмұнға басымдық бергені жөн.

Желідегі белсенділікті арттыру халыққа жақын болуға, жақсы жұмыс жасауға жақсы әсер етеді деп ойлаймыз.

Әлеуметтік желілерді жүргізу туралы ұсыныс: әлеуметтік желіні жүргізу форматын қайта қарау ұсынылады. 

Наурыз айындағы рейтинг қорытындысы осылай. Жалпы барлық әкімдерге ортақ ұсыныс бар, ол атқарылған жұмыстарды әлеуметтік желіде уақытылы, мазмұнды әрі сапалы форматта жариялау маңызды. Ақпараттар грамматикалық талаптарға сай, көркем визуалмен сүйемелденіп, қарапайым халыққа түсінікті тілде ұсынылса, бұл әкімдік жұмысының тиімділігін арттырып, халықпен сенімді қарым-қатынас орнатуға сеп болары анық.

Ай сайын қайталанып айтылып жүрген ескертулер ескерілсе, жұмыс нәтижесі де соғұрлым жемісті болмақ. Ал үздік үштікке енген әкімдерді шын жүректен құттықтаймыз! Еңбектеріңіз ел игілігіне жарай берсін, әрдайым биік белестерден көріне беріңіздер!