2025 жылғы 2 сәуірде Қазанда (Татарстан Республикасы) ТМД Электр энергетикалық кеңесінің 66-отырысы өтті. Отырыс ТМД Электр энергетикалық кеңесінің президенті, Ресей Федерациясының Энергетика министрінің төрағалығымен «ЭНЕРГОПРОМ» Татарстан энергетикалық форумы аясында ұйымдастырылды.

Отырысқа Қазақстан Республикасы Энергетика вице-министрі Есімханов С.Қ. қатысты. Ол өз баяндамасында Қазақстанның электр энергетикасы саласын дамытудың негізгі аспектілерін, жүргізіліп жатқан реформалар мен генерация секторын жаңғырту жөніндегі жоспарларын таныстырды.

«Қазақстанның электр энергетика саласы алдында маңызды міндеттер тұр – энергетикалық жүйенің тұрақтылығын қамтамасыз ету, жаңа қуат көздерін дамыту және заманауи технологияларды енгізу. Біз нормативтік базаны жетілдіру және энергетика саласына инвестиция тарту үшін қолайлы жағдай жасау жұмыстарын жалғастырып келеміз», – деп атап өтті Сұнғат Қуатұлы Есімханов.

Отырыс барысында қатысушылар ТМД елдерінің энергия жүйелерінің жұмыс істеуіне қатысты өзекті мәселелерді, электрмен жабдықтаудың сенімділігін арттыру шараларын, сондай-ақ салаға инновациялық шешімдерді енгізу перспективаларын талқылады.

ТМД Электр энергетикалық кеңесінің отырысы энергетика саласындағы ынтымақтастықты үйлестіру және тәжірибе алмасу үшін маңызды алаң болып қала береді.