Семей – облыстық мәртебесінен айырылғалы өңір біраз несібесінен қағылып келді. Өңірдің өркені басқа аймақтармен салыстырғанда, экономикасы тұралап, ел төлежіп қалғаны рас. Облыс қайта құрылғанда елдің ертеңге деген үміті қайта оянды. Алайда, алғашқы қадам – көп нәтиже бермегені де жасырын емес...

Сонымен биыл Абай елінің өз төлі, төрге шығып, туған елінің қызметіне кірісті. Бірден ауыл, аудандардағы ахуалды өз көзімен көріп, біраз ел игілігі үшін біраз ілкімді істер жасалатынын айтты.

Әрине, кез келген өңірде қордаланған, кезек күттірмейтін проблемалар бар. Алайда ұзақ мерзімді, стратегиялық даму жоспар болмай ел дамымайды. Оның зиянын тек халық көреді. Мысалы, өркениетті елдерде стратегиялық даму жоспар – ең кемі бес-он жылға жасалады. Қазір біздегі әкімдер қысқа мерзімді, тез шешіліп, бірден нәтиже беретін жұмыстарды көбірек қолға алады. Мысалы, қыста көше көк тайғақ болса, тұз себе салады. Бұл экологияға зиян екені ескерілмейді. Сол секілді қала асфальттарын жамау, бордюр ауыстыру секілді істер – көз алдау ғана. Бізге Шәкәрім атамыздың «Жұрт бүгіншіл менікі ертең үшін» дейтін болашаққа нық қадам керек.

Осы ретте, Абай облысының жаңа тағайындалған әкімі Берік Уәли өңірдің тұрақты дамуы үшін осындай  ұзақ мерзімді істерді қолға ала бастады деуге болатын сияқты. Бұл кешегі және бүгінгі бірнеше кейстерге қарап түйген ой.

Жылу жүйесі.  Мәселен, кеше елді мекендерді жылыту мәселесі айтылды. Өте дұрыс. Қазір күн жылынып, көктем шыққанымен, қыс қайта келетін «кәрі құдаң». Қаладағы жылу желілерін жаңғыртуға 6,6 млрд теңге бөлініп, жұмыс басталған көрінеді. «2030 жылға дейін күтетін уақыт жоқ. Жылу тапшылығын жою үшін қазірден бастап батыл әрекет етуіміз керек», деді әкім. Осы ретте қазандықтар мен жылу магистральдарын салу жоспарланғаны айтылды.

Баспаналы болу. Екінші өңірдегі өте өзекті мәселенің бірі – баспана. Бүгінде облыста 20 мыңнан астам азамат баспана кезегінде тұр. Бұл проблеманы шешу үшін биыл 370 мың шаршы метр тұрғын үй пайдалануға берілмек. Оның ішінде көпқабатты және жеке тұрғын үйлер қамтылған. Ал 2026 жылға дейін 14 кредиттік үй салынып, тағы 15 үйдің жобасы дайындалып жатқаны айтылды. Бұған қоса тағы да тұрғын үй құрылысы жалғасады деген ойдамыз.

Ет комбинаты. Семей – атакәсібі мал шаруашылығымен өркендеген өңір. Кеңестік дәуірде аты алысқа кеткен әйгілі ет комбинаты қаланың әлеуметтік-экономикалық тірегіне айналған еді. Бүгінде осы тарихи сабақтастық қайта жанданатын тәрізде. Австралияның заманауи технологиясымен жабдықталатын бұл ет комбинаты жобасының құны – 8,4 млрд теңге. Кәсіпорын іске қосылған күні онда 250 адам тұрақты жұмыспен қамтылмақ. Бұл іс жүзеге асса, өңірдің экономикалық өсімі жаңа бір биікке көтерілер еді.

Экомәдениет. Экологиялық мәдениетті қалыптастыру мақсатында бүгін облыс әкімі «Таза Қазақстан» акциясы аясында аймақ халқына бейнеүндеу жасады. Елімізде бұл акция басталғалы дәл бір жыл болды. Жұрт болып жұмыла атқарған жұмыс осы күні шын мәнінде елдік сипат алып үлгерді. Бүгінде тұрмыстық қалдықтар мен күл-қоқыс тұмса табиғатты тұншықтырып барады. Бұрыш-бұрышқа, қуыс-қуысқа көзіңіз түссе, желмен желпілдеген целлофандар мен қаудырлай ұшқан пластмасс құтылар құтыңызды қашырады. Бұған қоса Абай облысы экологиялық аймақ. Сондықтан табиғатқа деген жанашырлықты ынталандыру да келешекті жұмыс. Расында бұл бір реттік науқан емес, мұны – халықтың экологиялық мәдени санасын қалыптастыратын ұлттық идея деп түсінуге болады.

Семейге тың серпін керек. Өңірдің тамырына қан жүгіртіп, кем-кетігін толтыратын кез жетті. Атқарылар істің ауқымы кең, мақсаты айқын. Кеше тарихы даңқты өңір болса, бүгін экономикасы қуатты, өмір сүруге қолайлы аймаққа айналуға тиіс. Оған өңірдің әлеуеті жетеді.