ҚР Премьер-министрінің бірінші орынбасары Роман Скляр бастаған қазақстандық өкілді делегацияның Германияға сапары Бавария федералды жерінің астанасы Мюнхен қаласында жалғасты.

Сапар аясында Роман Скляр Бавария Премьер-министрінің орынбасары – экономика, өңірлік даму және энергетика министрі Хуберт Айвангермен және халықаралық ынтымақтастық пен Еуропа мәселелері жөніндегі министрі Эрик Байсвенгермен кездесулер өткізді.

Бавария федералды жері үкіметінің ғимаратында өткен Э. Байсвенгермен кездесуде Қазақстан мен Бавария үкіметтері арасындағы ынтымақтастықты дамыту мәселелері талқыланды.

Өз кезегінде, Э. Байсвенгер Баварияның Қазақстанмен жан-жақты іскерлік және гуманитарлық байланыстарды одан әрі кеңейтуге үлкен қызығушылық танытатынын атап өтіп, тиісті бастамаларды қолдауға дайын екенін білдірді.

Х. Айвангермен кездесу барысында тараптар Қазақстан мен Бавария арасындағы сауда-экономикалық қатынастардың жағдайы туралы пікір алмасып, әрі қарай дамыту келешегін талқылады.

Х. Айвангер Қазақстанның қарқынды дамуын әрі экономикасын әртараптандырудағы жетістіктерін атап өтіп, бұл Бавария компаниялары үшін жақсы мүмкіндіктер ұсынатынын айтты. Атап айтқанда, Қазақстан мен Бавария экономикасының өзара толықтыратынына назар аударылды, бұл бизнес үшін өзара тиімді ынтымақтастықты дамытуға қызығушылығын туғызады.

Осы тұрғыда маңызды қадам ретінде 2025 жылғы мамыр айының соңында Шымкент–Мюнхен тікелей әуе рейсінің іске қосылуы күтілуде.

Сонымен қатар Р. Скляр мен Х. Айвангер осы күні өткен «дөңгелек үстелде» баяндама жасап, «Қазақстан–Бавария бизнес-диалогы: Қазақстан өнеркәсіп және ауыл шаруашылығы технологиялары мен логистика саласындағы серіктес ретінде» тақырыбында пікір алмасты.

Іс-шараға Баварияның шамамен 70 кәсіпорнының басшылары қатысты. Қазақстандағы кәсіпкерлікті дамыту тәжірибесімен және елдегі қаржылық әрі іскерлік мүмкіндіктер туралы Horsch, Linde Gas AG және Rhenus сияқты компаниялардың өкілдері пікірін бөлісті.

Өз сөзінде Х. Айвангер Баварияның Қазақстанмен тығыз экономикалық байланыстарын жоғары бағалады. Оның айтуынша, Қазақстан бүгінгі таңда Баварияның ТМД және Орталық Азия елдері арасындағы ең ірі сауда серіктесі болып саналады.

Р. Скляр сондай-ақ «дөңгелек үстелдің» тең ұйымдастырушысы болған «Бавария экономикасы одағы» іскерлік қауымдастығының төрағасы Бертрам Броссардтпен келіссөз жүргізді.

Бавария – экономикалық даму бойынша Германиядағы жетекші федералдық жер саналады. 2024 жылы оның ЖІӨ көлемі шамамен $800 млрд-ты (Германия – 4,5 трлн) құрап, оны әлемде 22-ші орынға қойды. Бұл көрсеткіш Аргентина, Оңтүстік Африка, БАӘ, Швеция, Израиль, Австрия және Бельгия сияқты елдерден жоғары.

Неміс статистикасы бойынша, 2024 жылы Қазақстан мен Бавария арасындағы сауда көлемі 4,7 млрд еуроға жетті, бұл Қазақстан мен Германия арасындағы жалпы сауда көлемінің шамамен жартысына тең. Баварияның мұнай импортының жартысын Қазақстаннан жеткізілетін шикізат құрайды.

Егер Қазақстан Германия үшін сауда серіктестерінің ішінде 43-орында болса, Бавария үшін 21-орында тұр. Баварияға импорт көлемі бойынша Қазақстан 15-орында, яғни Бельгия, Түркия, Жапония, Вьетнам және Оңтүстік Кореядан жоғары көрсеткішке ие.