Президент Қасым-Жомарт Тоқаевтың бастамасымен қолға алынған «Таза Қазақстан» бағдарламасы аясында Абай облысында жалпыөңірлік тазалық акциясы басталды. Сенбілікке мемлекеттік мекемелердің, бюджеттік ұйымдардың, жоғары және орта оқу орындарының, шағын және орта бизнес нысандарының өкілдері, қоғамдық және жастар ұйымдары, облыстық, қалалық және аудандық мәслихат депутаттары, аймақтың қарапайым тұрғындары белсенді атсалысты.

Семей қаласында өткен тазалық шарасына жұртшылықпен бірге облыс әкімі Берік Уәли де қатысты. Айта кетейік, аймақ басшысы 4 сәуірде облыс тұрғындарына арнайы үндеу жасап, жалпыөңірлік тазалық акциясы басталатынын жариялаған болатын.

Облыс орталығында өткен сенбілікте аймақ басшысы бұл тазалық акциясы бір реттік емес, жыл бойы жалғасатынын атап өтті.

Ерекше атап өтерлігі, акция барысында арнайы байқау жарияланып, «үздік аудан», «үздік ауыл», «үздік аула», «үздік университет», «үздік колледж», «үздік мектеп», «үздік балабақша», «үздік көше», «үздік мекеме», тағы басқа да номинациялар бойынша тазалық жанашырлары анықталады. Жыл соңында жеңімпаздарға қомақты сыйлықтар табысталады.