Облыс әкімі Берік Уәли Аягөз ауданына жұмыс сапары барысында Емелтау ауылындағы бірқатар нысандарды аралады.

Емелтау - Қарағанды облысымен шектесетін, аудандағы ең шалғай елді мекендердің бірі. Облыс орталығынан 600, аудан орталығы Аягөзден 240 шақырым қашықтықта орналасқан.

Аймақ басшысы ең әуелі ауылдағы Төлеу Көбдіков атындағы жалпы орта білім беретін мектепте болды. 1983 жылы салынған ғимарат 100 оқушыға арналған. Қазіргі уақытта 39 оқушы білім алады, 12 мұғалім еңбек етеді. Білім ордасы осы күнге дейін күрделі жөндеу көрмеген. Мектепте пән мұғалімдері тапшы.

Облыс әкімі ауылдағы Мәдениет үйінде тұрғындармен кездесті. Жиында жол жөндеу, балабақша салу, интернет желісін орнату, елді мекенге жақын кен орындарының ауылға көмек көрсетуіне қатысты мәселелер көтерілді.
Аймақ басшысы елді мекеннің интернет мәселесі жақында шешімін табатынын, ауылға антенналық матчты құрылғы орнатылатынын, бұған облыстық бюджеттен тиісті қаржы бөлінгенін айтты. Аудан әкіміне кен орындарымен тиісті меморандумға отырып, кәсіпорынннан түскен қаражаттың ауыл тұрғындарының игілігіне жарауын қадағалауды тапсырды. «Емелтау – Баршатас» бағытындағы жолды тегістеп, ретке келтіруді міндеттеді.

Аймақ басшысы елді мекенде «Ауылдық денсаулық сақтауды жаңғырту» бағдарламасымен салынған фельдшерлік-акушерлік пунктте де болды. Медициналық мекеме құрылысы аяқталғанымен әлі іске қосылмаған. Мердігер «Construction Group «SAMRUK» ЖШС құрылысты сапасыз жүргізген. Облыс әкімі Құрылыс басқармасына мердігерлермен бірлесіп кемшіліктерді жойып, нысанды тезірек іске қосуды тапсырды.