Абай облысының әкімі Берік Уәли вагондардың жылжымалы құрамына отырып, Семей қаласына кіреберіс жолдардың тазалығын тексерді. Аймақ басшысы «Семей» және «Жаңа Семей» станциялары аралығындағы темір жол жиектеріне назар аударды.

Тексеріс барысында Семей қаласының ішінде және шеткері аумақтарында бірқатар рұқсат етілмеген қоқыс үйінділері бар екені анықталды.

Облыс әкімі қала әкімдігінің өкілдеріне теміржол бойындағы аумақтарды бақылауда ұстап, жол жиегінде шашылып жатқан қоқыстарды дереу шығаруды тапсырды. Тазалық талаптарын орындамағандарға заң аясында тиісті шара қолданылатынын ескертті.

Айта кетейік, аймақта 5 сәуірде «Таза Қазақстан» бағдарламасы аясында облыс әкімінің бастамасымен жалпыөңірлік тазалық акциясы басталған болатын. Апта сайын өткізілетін сенбіліктерге 105 мыңға жуық тұрғын атсалысып, 4581 ұйым мен 2 мыңға тарта техника жұмылдырылды. 77 мың аула тазаланып, 955 саябақ пен 300-ден астам ескерткіш аумағы реттелді. 20 мың тонна қатты тұрмыстық қалдықтар қоқыс полигонына шығарылды.