ҚР Еңбек және халықты әлеуметтік қорғау министрі Светлана Жақыпова Еңбек ресурстарын дамыту орталығы базасында жұмыс кеңесін өткізді, оның қорытындысы бойынша өңірлік мансап орталықтарына әдіснамалық қолдау көрсету үшін құзыретті мамандар тобы құрылды. Топтың негізгі міндеті – жергілікті жерлерде цифрлық құралдарды тиімді енгізуді қамтамасыз ету және елде жаңа жұмыс орындарын құру бойынша жұмыс сапасын арттыру.

Кеңес барысында өңірлердегі қызмет үшін негіз болатын үш негізгі жоба белгіленді, бұл:

- 2024 жылғы сәуірде іске қосылған және кәсіпорындарда мүмкін болатын еңбек тәуекелдерінің алдын алу тәсілдерін жетілдіруге бағытталған Еңбек тәуекелдерінің цифрлық картасы;

- Кадрлық қажеттіліктерді талдау мен болжауды, сондай-ақ мемлекеттік инвестициялардың тиімділігін арттыру мақсатында жобалардың іске асырылуына мониторинг пен бақылауды қамтамасыз ететін жобалардың инновациялық навигаторы;

- Республиканың егіс алқаптарының 97% қамтитын технологиялық карталар негізінде жұмыскерлердің нормативтік санын есептеуге мүмкіндік беретін ауыл шаруашылығындағы еңбек ресурстарын нормалау жүйесі. Жұмыс берушілерге HR Enbek порталы арқылы еңбек ресурстарына қажеттілікті есептеу мүмкіндігі берілді. Бұл жүйе сондай-ақ талаптарды орындамау жағдайларын, атап айтқанда, мемлекеттік субсидия алған ауыл шаруашылығы кәсіпорындарында қомақты жер телімдері бар, бірақ олардың жұмысшыларымен ресми еңбек шарттары болмаған кездегі жағдайларды анықтауға көмектеседі.

Осы цифрлық шешімдердің барлығы еңбек қатынастарын ресімдеуге, азаматтардың еңбек құқықтарын қамтамасыз етуге және қазақстандықтардың әлеуметтік кепілдіктерін іске асыруға бағытталған.

Бүгінгі таңда мамандар тобы өңірлерде — бірінші кезекте Түркістан облысы мен Шымкент қаласында жұмыс істей бастады, онда Еңбек министрлігінің жобаларын тиімді іске асыру мақсатында әдіснамалық қолдау және практикалық сүйемелдеу көрсетіледі.