Абайдың «Жидебай-Бөрілі» мемлекеттік музей-қорығында Ұлы Жеңістің 80 жылдығына орай «Отан үшін от кешкен Абай ұрпақтары» атты мәдени-танымдық іс-шара өтті. Ел тарихындағы елеулі оқиғаға арналған бұл жиын ұлы ойшылдың ұрпақтарының Екінші дүниежүзілік соғыстағы ерлігін ұлықтауға арналды.

Шара барысында Абай Құнанбайұлының майданға аттанған тоғыз ұрпағының тағдыры туралы деректер мен архивтік құжаттар ұсынылды. Олардың тек екеуі — Алпаш пен Ишағы Жағыпарқызы — қан майданнан аман оралған. Қатысушылар Абай ұрпақтарының ерлігі жайлы мазмұнды баяндамалар мен тағылымды естеліктерімен танысты.

Іс-шарада Абайдың «Жидебай-Бөрілі» мемлекеттік қорық-музейінің директоры Ұлан Сағадиев құттықтау сөз сөйлеп, шараның тарихи маңызын атап өтті. 

Тағылымды шараға Шоқан Уәлиханов атындағы Жас ұлан ерлер лицейінің тәрбиеленушілері, зиялы қауым өкілдері, студенттер мен музей қонақтары қатысты. Жас ұрпаққа патриоттық рух сыйлаған бұл жиын Отан үшін жан қиған боздақтарды еске алудың бірегей үлгісі болды.