Абай облысында 7 мыңнан астам жол ережесі бұзылған

28-05-2025, 13:10 Думан Кенжеғазыұлы

Абай облысының Өңірлік коммуникациялар қызметі алаңында 19 сәуір мен 19 маусым аралығында өтетін «Қауіпсіз жол» жедел-профилактикалық іс-шарасының қорытындысына арналған брифинг өтті.

Абай облысы Полиция департаменті жергілікті полиция қызметі басқармасының бастығы Әсет Өтеповтің мәліметінше, акция басталғалы бері жол қауіпсіздігі саласында 7608 құқықбұзушылық тіркелген.

– Оның 21 пайызы — өрескел заңбұзушылықтар. Атап айтқанда, 121 жүргізуші мас күйде ұсталып, 9 адам жалған нөмір пайдаланғаны үшін жауапқа тартылды. Сонымен қатар, 235 адам – жүргізуші куәлігінсіз, ал 44 адам жүргізу құқығынан айырылғанына қарамастан көлік басқарған. 558 азамат бағдаршамның қызыл шамына тоқтамай өткен. Барлығы 285 көлік айып тұрағына қойылды, – деді Әсет Өтепов.

Оның айтуынша, қазіргі таңда жол қозғалысы ережелерін сақтау бағытында балалардың қауіпсіздігіне ерекше мән беріліп отыр. Осы мақсатта өңірдегі 303 білім ордасында түсіндіру сабақтары ұйымдастырылған.

– 21 мамыр күні облыс орталығында жас жол инспекторларының байқауы өтті. Аталған шараға облыс бойынша 12 команда құрамындағы 84 оқушы қатысты, – деді ол.

Ал Абай облысы Полиция департаменті Әкімшілік полиция басқармасы басшысының орынбасары Бақытбек Сыдықбаев жол-көлік оқиғаларының алдын алу жүйелі жұмыс пен кешенді көзқарасты талап ететінін атап өтті.

– Жол қауіпсіздігі «жүргізуші – көлік – жол – орта» тізбегінің барлық элементінің теңгерімді жұмысына байланысты. Бүгінде тек әкімшілік шаралармен шектелу жеткіліксіз. Инфрақұрылым сапасын арттырып, қозғалысты ұйымдастыру деңгейін жетілдіру маңызды, – деді ол.

Спикердің айтуынша, 9 мың шақырымнан астам автожол тексеріліп, жол және коммуналдық қызметтерге 990 нұсқама жолданған. 90 лауазымды тұлға жауапкершілікке тартылған. Мониторинг барысында жарықтандыруы жоқ учаскелер, дұрыс қойылмаған белгілер мен жолақтар анықталған. Облыс аумағында 1500-ден астам бақылау камерасы орнатылған.

Брифинг соңында спикерлер әрбір жол қозғалысына қатысушының өз қауіпсіздігі үшін жауапты екенін еске салды.

– Автокөлік – қауіптілігі жоғары нысан. Әрбір жол-көлік оқиғасы – орны толмас қайғы. Рөлге отырған әр шешім – үлкен жауапкершілік. Мұны әр жүргізуші жадында ұстауы қажет, – деп түйіндеді Әсет Өтепов.

Тағыда оқыңыз

Анықтама Мемлекет басшысы Қасым-Жомарт Тоқаевтың Ұлттық құрылтайдың төртінші отырысында сөйлеген сөзі ТЖ министрі Юрий Ильин негізгі суға кету себептерін атады Мемлекет басшысы Қасым-Жомарт Тоқаевтың «Әділетті Қазақстанның экономикалық бағдары» атты Қазақстан халқына Жолдауы Жыл қорытындысы: құқық бұзушылыққа қарсы күресті күшейту, әйелдер мен балалар құқығын қорғау, ТЖ алдын алу және жою бойынша кешенді шаралар қабылдау

Бізге ақпарат жолдаңыз Телеграмдағы каналымыз

Абай облысында 7 мыңнан астам жол ережесі бұзылған

Пікірлер (0)