Абай облысында өңірлік ғылыми-практикалық конференция өтті. Атаулы шара Абай облысы әкімінің орынбасары Қуаныш Сүлейменовтің құттықтау сөзімен ашылды. Ол өз сөзінде ғылыми кадрларды даярлау мен өңірлік ғылымды дамыту – елдің тұрақты дамуына ықпал ететін стратегиялық бағыт екенін атап өтіп, конференция жұмысына сәттілік тіледі.

Шара аясында ядролық энергетика, цифрлық трансформация, ғылымның даму болашағы мен кадр даярлау мәселелері кеңінен талқыланды. Іс-шараға мемлекеттік органдардың өкілдері, ғылыми қауымдастық мүшелері мен сарапшылар қатысты.

Сонымен қатар, «Аймақтық ауыл шаруашылығы үшін ғылым: ауыл шаруашылығын өзгерту үшін университеттік технологиялар – деректерден шешімдерге дейін» тақырыбында Шәкәрім университетінің халықаралық байланыс және инновациялар жөніндегі проректоры Ерасыл Дулатбай баяндама жасады. 

Іс-шара соңында спикерлер мен қатысушылар арасында пікірталас өтіп, әр сала мамандары өз ұсыныстарын ортаға салды.