1 шілдеде Қазақстанда тұрмыстық химия тауарларын сәйкестендіру құралдарымен таңбалау жөніндегі пилоттық жоба басталады. Тиісті бұйрыққа ҚР Өнеркәсіп және құрылыс министрі қол қойды.

Пилот шеңберінде техникалық іске асыруды тестілеу жоспарлануда: таңбалау кодтарын енгізу тәсілдері, қолданыстағы бизнес-процестермен интеграция және қатысушылардың операциялық қызметіндегі ықтимал өзгерістер. Пилоттық жобаны орындауды Tañba Бірыңғай таңбалау және қадағалау операторы жүзеге асыратын болады.

Пилоттық жобаға ерікті түрде өндірушілер, импорттаушылар, сондай-ақ тұрмыстық химия тауарларының көтерме және бөлшек саудасын жүзеге асыратын субъектілер қосыла алады. Бұл нарық қатысушыларына таңбалаудың ақпараттық жүйесінің функционалдығын тегін тексеруге, таңбалау процесін ағымдағы өндірістік процестерге біріктіруді пысықтауға және таңбалау кодтарын енгізудің әртүрлі тәсілдерін сынақтан өткізуге мүмкіндік береді.

Пилоттық жоба шеңберінде әр түрлі нысандағы сабындар мен сабын құралдары, жуу және тазалау құралдары, оның ішінде пасталар, ұнтақтар мен сұйықтықтар, сондай-ақ сабынға малынған немесе жабылған қағаздан, мақтадан, тоқыма емес материалдардан жасалған бұйымдар таңбалануға жатады.

Тауарларды таңбалау ашық нарықты құруға көмектеседі және мемлекеттік органдарға тауарлардың өндірушіден түпкілікті тұтынушыға дейінгі қозғалысын бақылауға мүмкіндік береді, бұл контрафактілік және контрабандалық өнімдер санының азаюына ықпал етеді.

Айта кету керек, жалған тұрмыстық химия өнімдерінде аллергиялық реакциялар, терінің зақымдануы және денсаулыққа қауіп төндіретін сертификатталмаған компоненттер болуы мүмкін. Сонымен қатар, жалғандықтардың құрамында техникалық регламентте қарастырылмаған агрессивті заттар жиі кездеседі.

Тұтынушылар үшін таңбалау-бұл naqty enim мобильді қосымшасының көмегімен өнімнің түпнұсқалығын өз бетінше тексеру мүмкіндігі. Қаптамадағы кодты сканерлеу жеткілікті, содан кейін өнім, өндіруші және жеткізу тізбегі туралы ақпарат қол жетімді болады.

Қазіргі уақытта міндетті таңбалау үш тауар тобына енгізілді: аяқ киім, темекі өнімдері және дәрілік препараттар. Тоқыма өнеркәсібі тауарларын, сыра сусындарын, зергерлік бұйымдар мен мотор майларын таңбалау бойынша пилоттық жобалар аяқталды. Биологиялық белсенді қоспалар тауарларын таңбалау бойынша пилоттық жоба іске асырылуда.