Ақсу қаласында пробация қызметінің есебінде тұрған сотталған азамат электрондық бақылау құралын бүлдіргені үшін бас бостандығынан айырылды.

2024 жылдан бастап қоғамнан оқшаулаумен байланысты емес жаза түрлерін өтеп жатқан адамдарға қатысты электрондық бақылау жүйесі белсенді түрде қолданылуда. Алайда, барлық сотталғандар қойылған талаптарды орындай бермейді.

Мысалы, Ақсу қаласының пробация қызметінде есепте тұрған сотталған азамат сот жүктеген міндеттерді жүйелі түрде бұзған. Электрондық білезік тағылғанына қарамастан, ол пробация қызметін хабардар етпестен белгіленбеген уақытта бірнеше рет қала шегінен өз бетімен шығып кеткен. Сонымен қатар ол қасақана электрондық бақылау құралын зақымдаған.

Осы фактіге байланысты Ақсу қаласының пробация қызметі тиісті ұсыныс енгізіп, Ақсу қаласының мамандандырылған ауданаралық соты бұл ұсынысты қолдап, жазаның өтелмеген бөлігін бас бостандығынан айыру жазасына ауыстырды. Құқық бұзушылықтары үшін сотталған азамат жазасын одан әрі өтеу үшін бас бостандығынан айыру орындарына жіберілді.