Қазақстандық қоғамдық даму институтының бастамасымен, ҚР Мәдениет және ақпарат министрлігінің қолдауымен 21–28 тамыз аралығында Абай облысында материалдық емес мәдени мұра (МЕММ) элементтерін түгендеу бойынша далалық экспедиция ұйымдастырылды.

Экспедиция жұмысына ЮНЕСКО сарапшысы, педагогика ғылымдарының кандидаты, профессор В.В. Шахгулари, гуманитарлық ғылымдар магистрі Г.К. Қашақуқызы және «Фотоөнер» қоғамдық бірлестігінің мүшесі, журналист Т.Ш. Шаяхмет қатысты.

Мамандар облыс әкімдігінің қолдауымен аймақтағы МЕММ жеткізушілерімен кездесіп, жаңа элементтерді анықтады. Фотосюжеттерде Мақаншыдағы ұлттық киім тігу мен теңге алу, Жармадағы көкпар мен аударыспақ, Үржардағы құсбегілік, Аягөздегі асық ойыны, Көкпектідегі садақ ату және Семейдегі көмеймен ән айту дәстүрлері көрініс тапты.

Экспедиция қорытындысында шолу есебі әзірленеді. Бай мәдени мұраға ие өңіріміздің Қазақстандағы бес таңдаулы облыстың қатарына енгені – зор мақтаныш. Алда мұраны сақтау, дамыту және насихаттау бағытында кең көлемді жұмыстар жалғасады.