Бүгін Семей қаласындағы «Арена» мәдени-спорт кешенінде «Ғажайыпқа толы Жаңа жыл!» атты облыс әкімінің шыршасы өтті. Мерекелік шараға өңірдің 150 оқушысы қатысты.

Аймақ басшысының дәстүрлі шыршасына 9-13 жас аралығындағы жетім және ата-анасының қамқорлығынсыз қалған балалар, аз қамтылған және көпбалалы отбасылардан шыққан оқушылар, ерекше білім беру қажеттіліктері бар балалар, сондай-ақ оқу, спорт, шығармашылық және қоғамдық іс-шараларда жоғары жетістікке жеткен үлгілі оқушылар шақырылды. Мерекелік шараға облыстың қала-аудандарынан, ұйымдардан, арнайы интернаттар мен мекемелерден келген балалар да қатысты.

Облыс әкімі Берік Уәли балаларды Жаңа жыл мерекесімен құттықтап, лебізін жеткізді.

Бағдарлама аясында театрландырылған қойылым ұсынылып, аниматорлар мен балалар шығармашылық ұжымдары өнер көрсетті. Сонымен қатар Аяз Ата мен Ақшақардың қатысуымен ойындар мен байқаулар ұйымдастырылып, мерекелік концерт өтті.

Шыршаға қатысқан әр балаға облыс әкімі атынан 100 мың теңгенің сертификаты, тәттілер мен ойыншықтар салынған жаңа жылдық себет тарту етілді.