Семей қаласындағы қалаішілік қоғамдық көліктерде даңқты қолбасшы, халық қаһарманы Бауыржан Момышұлының «Әділет», «Адамгершілік», «Ар», «Ұят» туралы тағылымды сөздері тұрақты түрде аудиожүйе арқылы беріліп келеді. Бұл бастама жолаушыларға патриоттық тәрбие беріп, қоғамдық сана мен рухани құндылықтарды насихаттауға бағытталған.

Айта кетейік, Мемлекет басшысы Қасым-Жомарт Тоқаев былтыр тарихи әділдікті қалпына келтіру мақсатында Бауыржан Момышұлына «Халық қаһарманы» атағын беру туралы шешім қабылдаған болатын.

Президент өз сөзінде даңқты қолбасшының ерлігі тек елімізде ғана емес, шетелде де кеңінен танылғанын атап өтіп, оның тұлғалық болмысы мен ерлік жолының ұлт үшін ерекше маңызға ие екенін айтқан еді.

Бүгінде Семейдегі қоғамдық көліктерде батырдың өнегелі ойларының тұрақты берілуі жолаушылар арасында үлкен қолдау тауып, жас ұрпақтың отансүйгіштік рухын арттыруға ықпал етіп отыр.