Бүгін аймақ басшысы Берік Уәли Семей қаласындағы жол жөндеу және жаяу жүргіншілер жолын салу жұмыстарының барысын көрді.

Облыс әкімі әуелі Мичурин көшесіндегі орташа жөндеу жұмыстарының барысымен танысты. Жоба аясында жол негізін нығайту, асфальтбетон жабындысының төменгі және жоғарғы қабаттарын төсеу, жол жиектерін бекіту және инженерлік коммуникация құдықтарын ретке келтіру жұмыстары атқарылуда. Қазіргі уақытта ұзындығы 2 жарым шақырымнан асатын көшедегі асфальттың бірінші қабаты төселген. Мұндағы жұмыс маусым айының соңына дейін аяқталады.

Аймақ басшысы Северный промузел көшесінен Қарағайлы шағын ауданына дейінгі бағытта салынып жатқан жаяу жүргіншілер жолының құрылысын да көрді. Ұзындығы 1,5 шақырым болатын учаскеде жұмыс қарқынды жүргізілуде. Жоба қалалық бюджет есебінен қаржыландырылған. Құрылыс жұмыстары мамыр айында басталған, тамыз айының соңына дейін аяқталады деп жоспарланып отыр.

Облыс әкімі жол және жаяу жүргіншілер инфрақұрылымын дамыту тұрғындардың өмір сүру сапасын арттыруға тікелей әсер ететінін атап өтті.

Сондай-ақ, облыс әкімі Шәкәрім даңғылында Дулатов көшесінен Гагарин көшесіне дейінгі аралықта салынып жатқан жаяу жүргіншілер жолының құрылысын көрді. Ұзындығы 680 метр болатын учаскеде тұрғындардың қауіпсіз әрі қолайлы қозғалысы үшін заманауи талаптарға сай жаяу жүргіншілер жолы төселуде.

Бұрын көшенің осы аумағындағы ескі жаяу жүргіншілер жолын үнемі су басатын. Қазіргі уақытта жүргіншілер жолы жаңартылып, 20 сантиметрге биіктетілді.

Айта кетейік, былтыр облыс орталығындағы жиырмаға жуық көшеде жаяу жүргіншілер жолы жаңадан салынған болса, биыл 40-қа жуық көшеде жаяу жүргіншілер жолы салынып, жаңартылады.