Біріккен Араб Әмірліктерінде 15 жасқа толмаған балаларға әлеуметтік желілерді пайдалануға тыйым салынды. Мұндай шешімді елдің Министрлер кабинеті қабылдады.

Жаңа заңға сәйкес, 15 жасқа дейінгі балалар әлеуметтік желілерде жеке аккаунт ашып, оны пайдалана алмайды. Шектеулер контент жариялауға, пікір қалдыруға, ашық топтарға қатысуға және басқа да әрекеттерге қолданылады.

15 пен 16 жас аралығындағы жасөспірімдерге платформаларды пайдалануға рұқсат беріледі, алайда олардың аккаунттары қосымша шектеулермен жұмыс істейді. Әлеуметтік желілер бейтаныс пайдаланушылармен байланыс орнатуға қатысты бірқатар функцияларды өшіруге және ата-аналарға бақылау құралдарын ұсынуға міндетті болады.
Сонымен қатар, БАӘ билігі әлеуметтік желілерді пайдаланушылардың жасын сенімді түрде тексеру жүйесін енгізуге міндеттеді. Ол үшін компаниялар цифрлық жеке сәйкестендіру, биометриялық технологиялар және жасанды интеллект негізіндегі құралдарды пайдалана алады.

Құжатта кәмелетке толмағандардың деректерін жекелендірілген жарнама мен коммерциялық мақсаттарда пайдалануға да тыйым салынған.
Жаңа талаптардың орындалуын БАӘ-нің мемлекеттік реттеуші органдары қадағалайды. Ережелерді бұзған платформаларға ішінара немесе толық бұғаттауға дейінгі санкциялар қолданылуы мүмкін.

Компанияларға жаңа нормаларды енгізу үшін 12 ай уақыт берілді.

Жуырда цифрлық платформаларды бақылау мәселесі Қазақстанда да қайта талқыланды.
Бірнеше күн бұрын Ұлыбританияның премьер-министрі Keir Starmer 16 жасқа толмаған балалардың әлеуметтік желілерді пайдалануына тыйым енгізілетінін жариялаған болатын.