Үржар ауданының Жоғарғы Егінсу ауылында мәдениет үйі ашылды

Бүгін, 16:17 018.kz

Бүгін Үржар ауданының Жоғарғы Егінсу ауылында мәдениет үйі пайдалануға берілді. Жаңа нысанның ашылу салтанатына облыс әкімі Берік Уәли, Қазақстанның Халық әртісі, күйші Секен Тұрысбек қатысты.

«Ауыл – ел бесігі» бағдарламасы аясында салынған нысанның жалпы ауданы 1 356,8 шаршы метрді құрайды. Екі қабатты заманауи ғимаратта 100 орындық көрермен залы, кітапхана, домбыра, ән және би үйірмелеріне арналған кабинеттер, шығармашылық бөлмелер, әкімшілік кабинеттер және әртістерге арналған арнайы бөлмелер қарастырылған.

Сонымен қатар ғимарат мүгедектігі бар азаматтардың қажеттіліктеріне толық бейімделіп салынған. Жаңа мәдениет үйі ауыл жастарының шығармашылық әлеуетін дамытуға, өнерге баулуға, ұлттық мәдениетті дәріптеуге және ауыл тұрғындарының бос уақытын тиімді ұйымдастыруға қызмет етпек.

Салтанатты шарада құттықтау сөз сөйлеген аймақ басшысы жаңа ғимарат ауыл тұрғындарының игілігіне қызмет ететінін атап өтті.

«Мемлекет басшысы Қасым-Жомарт Тоқаев «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауында мемлекеттің мәдениетті қолдауы қашанда тоқтамайтын үдеріс, маңызды стратегия екенін нақты атап өткен болатын. Былтыр көктемде ауданға келіп, осы ауылдың ахуалымен танысқан кезде мәдениет үйінің құрылысы тоқтап тұрған болатын. Дер кезінде тиісті қаржыны бөлу туралы шешім қабылдап, бүгін тарихи күнге куә болып отырмыз. Мәдениет үйінің осы ауылда ашылуы заңдылық. Өйткені, бұл елді мекенде Қазақстанның Халық әртісі, Мемлекеттік сыйлықтың лауреаты Секен Тұрысбеков дүниеге келген. Баршаңызды Жоғарғы Егінсу ауылындағы жаңа Мәдениет үйінің салтанатты ашылуымен шын жүректен құттықтаймын! Бүгінгі күн – ауыл тарихындағы айтулы әрі маңызды оқиға. Бұл нысан – жай ғана ғимарат емес. Бұл – ауылдың рухани өмірін жандандыратын, мәдениет пен өнерді дамытуға жол ашатын, ұлттық құндылықтарымызды насихаттайтын маңызды орталық. Ең бастысы, бұл – соңғы қырық жыл ішінде Үржар ауданында салынған алғашқы мәдениет үйі. Сондықтан оның әлеуметтік және рухани маңызы ерекше. Осы маңызды жобаның жүзеге асуына атсалысқан құрылысшыларға, жобалаушыларға, мемлекеттік органдардың өкілдеріне және қолдау көрсеткен барлық азаматтарға шынайы ризашылығымды білдіремін», – деді Берік Уәли.

Мәдениет үйінің ашылуы аясында жаңа ғимаратта күйші-композитор, Қазақстанның Халық әртісі, Мемлекеттік сыйлықтың иегері Секен Тұрысбектің шығармашылық кеші өтті. Кеште Семейдегі Әміре Қашаубаев атындағы облыстық филармония өнерпаздары да өнер көрсетті. Шара соңында облыс әкімі Секен Тұрысбекті шығармашылық кешінің табысты өтуімен құттықтап, күйші басқаратын Әміре Қашаубаев атындағы мемлекеттік филармониясына автобус сертификатын сыйға тартты.

Тағыда оқыңыз

Жаңа Конституцияның жобасы республикалық референдумға шығарылды Қазақстан Республикасының жаңа Конституциясының жобасы жарияланды Көкпекті ауданының 2025 жылдың әлеуметтік-экономикалық даму көрсеткіштері Қазақстан Республикасының жаңа Конституциясы жарияланды Мемлекет басшысы Қасым-Жомарт Тоқаевтың Ұлттық құрылтайдың бесінші отырысында сөйлеген сөзі

Бізге ақпарат жолдаңыз Телеграмдағы каналымыз

Үржар ауданының Жоғарғы Егінсу ауылында мәдениет үйі ашылды

Пікірлер (0)