Бүгін Семей қаласындағы Абай атындағы театрда мемлекеттік қызметшілер күніне арналған салтанатты шара өтті. Оған облыс әкімі Берік Уәли қатысып, мемлекеттік қызметкерлерді кәсіби мерекемен құттықтады.

Аймақ басшысы мемлекеттік қызметтің қоғам мен мемлекет арасындағы сенімді байланысты қамтамасыз ететін маңызды сала екенін атап өтті.

Салтанатты шара барысында мемлекеттік қызмет саласында жемісті еңбек етіп жүрген бірқатар қызметкерлерге мемлекеттік және ведомстволық марапаттар табысталды. Облыстық Ішкі саясат басқармасының басшысы Жарқын Жұмаділов Қазақстан Республикасы Президенті Қасым-Жомарт Тоқаевтың Алғысымен және «Барыс» төсбелгісімен, Абай облысының қаржы басқармасының басшысы Гүлфайрус Серікболова «Үздік мемлекеттік қызметші» төсбелгісімен марапатталды. Осы салада ұзақ жыл жұмыс істеп келе жатқан бірнеше азаматқа «Мемлекеттік қызмет ардагері» төсбелгісі берілді. Ерекше атап өтерлігі, алғаш рет мемлекеттік қызмет саласында еңбек етіп жүрген бірнеше қызметкердің ата-анасына бала тәрбиесіндегі еңбегі үшін облыс әкімінің Алғыс хаты табыс етілді.

Сондай-ақ, салтанатты шара барысында Абай облысы бойынша «Үздік сапалы қызмет көрсетуші» байқауының қорытындысы жарияланды. Абай облысының спорт және дене шынықтыру басқармасының бөлім басшысы Байарыстан Башенов байқау жеңімпазы атанды.

Мерекелік шара соңында арнайы концерттік бағдарлама ұсынылып, танымал эстрада әншісі Қанат Үмбетов өнер көрсетті. Сондай-ақ, жас драматург Жәнібек Әлікеннің табиғатты қорғау, азаматтық жауапкершілік пен адалдық құндылықтарын насихаттайтын «Қарағай» драмалық спектаклі сахналанды.

Айта кетейік, қазіргі таңда облыста мемлекеттік қызмет жүйесінде кадрлық әлеуетті нығайту бағытында маңызды жобалар жүзеге асырылуда. Соның бірі – Өңірлік кадр резерві. Жоба аясында өңірімізден іріктелген 25 азаматтың 13-і мемлекеттік қызметке тағайындалды.

Сонымен қатар, мемлекеттік грантпен білім алған үздік түлектерді конкурссыз жұмысқа орналастыру тетігі нәтижесінде 40 жас маман мемлекеттік қызмет қатарын толықтырды.