Қытай Халық Республикасының Шыңжаң Ұйғыр автономиялық ауданының әкімшілік орталығы Үрімші қаласында «Семей» әлеуметтік-кәсіпкерлік корпорациясы» АҚ-ның инвестициялық-сервистік кеңсесі ашылды.

Кеңсенің ашылу рәсіміне облыс әкімі Берік Уәли қатысып, бұл бастама өңірдің инвестициялық әлеуетін халықаралық деңгейде ілгерілетуге және Қытай инвесторларымен тікелей байланыс орнатуға мүмкіндік беретінін атап өтті.

Жаңа ашылған кеңседе аймақ басшысы шет елдік инвесторлармен кездесіп, ынтымақтастықты кеңейту, бірлескен жобаларды іске асыру мәселелерін талқылады.

Абай облысы мен Шыңжаң Ұйғыр автономиялық ауданының арасында 250 шақырымнан астам мемлекеттік шекара бар. Екі ел арасындағы «Бақты» шекаралық өткізу пункті өңіраралық сауда-экономикалық ынтымақтастықты дамытуда маңызды рөл атқарады. Биылғы жылдың қаңтар-сәуір айларында Абай облысы мен Қытай Халық Республикасы арасындағы тауар айналымы 952 миллион АҚШ долларын құрап, өткен жылдың сәйкес кезеңімен салыстырғанда 43 пайызға артты. Ал экспорт көлемі 842 миллион АҚШ долларына жетіп, 41 пайызға өсті.

Жаңа инвестициялық-сервистік кеңсе Абай облысында жобаларды жүзеге асыруға қызығушылық танытқан қытайлық инвесторлар мен кәсіпкерлерге ақпараттық-консультациялық және ұйымдастырушылық қолдау көрсетеді. Кеңсе әлеуетті инвесторлардың өтініштерін қабылдап, бастапқы талдау жүргізеді, жобалық материалдарды әзірлеуге жәрдемдеседі, іскерлік кездесулер ұйымдастырып, ұсыныстарды әрі қарай қарау үшін «Семей» әлеуметтік-кәсіпкерлік корпорациясына жолдайды.

Айта кететін жәйт, кеңсе инвестициялық-сервистік алаң ретінде ғана жұмыс істейді. Қазақстан Республикасының дипломатиялық, консулдық немесе өзге де ресми өкілдігі болып саналмайды. Кеңсе виза, рұқсат құжаттары немесе мемлекеттік қолдау шараларын рәсімдемейді және мұндай шешімдерді қабылдау құзыретіне ие емес. Негізгі міндеті – инвесторларға сапалы ақпарат ұсынып, Абай облысымен тиімді іскерлік байланыс орнатуға жағдай жасау.