Конституция – халықтың құжаты және әділетті мемлекеттің негізі » 018.kz

Конституция – халықтың құжаты және әділетті мемлекеттің негізі

Бүгін, 09:00 Думан Кенжеғазыұлы

1 шілде – мемлекет дамуының тарихи маңызды кезеңдерінің бірі. Бұл туралы Әлихан Бөкейхан университетінің Тәрбие жұмысы және әлеуметтік мәселелер жөніндегі проректоры, қоғам белсендісі Айрат Базенов өз пікірін білдірді.

Айрат Базеновтің айтуынша, мемлекеттердің даму бағытын тек экономикалық реформалар немесе саяси оқиғалар ғана емес, ең алдымен конституциялық таңдаулар айқындайды.

«Конституция – заңдар жинағы емес. Конституциялық құқық ғылымында ол мемлекеттің қоғамдық келісімі әрі ұлттың өркениеттік бағдары ретінде қарастырылады. Ол қоғамның қандай құндылықтарға сүйеніп өмір сүретінін, мемлекет пен азаматтың қарым-қатынасы қандай қағидаттарға негізделетінін белгілейді», – деді Айрат Базенов.

Оның пікірінше, 1 шілде – жаңа құқықтық нормалардың күшіне ену күні ғана емес, әділетті мемлекеттілік идеясына негізделген ел дамуының жаңа кезеңі. Сонымен қатар бұл – халықтың референдум арқылы білдірген еркінің нақты құқықтық күшке айналған тарихи сәті.

«Конституцияның күші оның мәтінінде емес, қоғамның оны өзінің ортақ құндылығы ретінде қабылдауында. Конституция халықтың меншігіне айналған кезде ғана құқықтық мемлекет шын мәнінде қалыптаса бастайды», – деді Айрат Базенов.

Сондай-ақ ол Конституцияның басты ерекшелігіне тоқталып, оның халықтың еркін білдіретін негізгі құжат екенін атап өтті.

«Конституция қабылданған кезде мемлекет халыққа заң бермейді. Керісінше, халық мемлекетті қалай жұмыс істеу керектігін Конституция арқылы белгілейді. Сондықтан Конституция – биліктің емес, халықтың құжаты», – деді ол.

Айрат Базенов әлемнің дамыған елдерінің тәжірибесінде Конституция тұрақты экономикаға, сапалы білімге, әділ сотқа және қоғамдағы сенімнің нығаюына жол ашатынын айтты.

Сонымен бірге ол Конституцияның тиімділігі оны жүзеге асыратын адамдарға байланысты екенін ерекше атап өтті.

«Ешқандай Конституция өздігінен әділет орната алмайды. Оның шынайы күші оны құрметтейтін азаматта, оны адал орындайтын мемлекеттік қызметшіде және заңды бәрінен жоғары қоятын қоғамда. Бұл – әрқайсымыздың заңға, жауапкершілікке және ортақ болашағымызға деген көзқарасымызды жаңартатын күн. Өйткені күшті Конституцияның ең үлкен тірегі – саналы азамат», – деп түйіндеді Айрат Базенов.

Тағыда оқыңыз

Жаңа Конституцияның жобасы республикалық референдумға шығарылды Қазақстан Республикасының жаңа Конституциясының жобасы жарияланды Қазақстан Республикасының жаңа Конституциясы жарияланды Мемлекет басшысы Қасым-Жомарт Тоқаевтың Ұлттық құрылтайдың бесінші отырысында сөйлеген сөзі Қасым-Жомарт Тоқаев: Біз озық ойлы ұлт ретінде тек қана алға қарауымыз керек

Бізге ақпарат жолдаңыз Телеграмдағы каналымыз

Конституция – халықтың құжаты және әділетті мемлекеттің негізі

Пікірлер (0)